काठमाडाैँ । मोरङमा एक नाबालिकालाई विभिन्न प्रलोभनमा पारी जबरजस्ती करणी गरेको आरोपमा प्रहरीले पाँच जनालाई पक्राउ गरेको छ।
जिल्ला प्रहरी कार्यालय मोरङका अनुसार पक्राउ पर्नेमा रंगेली नगरपालिका–३ आमतोलाका १८ वर्षीय मोहम्मद अरमान, सुनवर्षी नगरपालिका–९ का २१ वर्षीय सुमनकुमार साह, रंगेली नगरपालिका–७ जर्बी टोलका २० वर्षीय करण मण्डल, रंगेली नगरपालिका–७ का १८ वर्षीय प्रियान्सु साह र रंगेली नगरपालिका–६ का १८ वर्षीय रितिक यादव रहेका छन्।
प्रहरीका अनुसार गत साउन ३ गते बिहान करिब ९ बजे सुनवर्षी नगरपालिकाकी एक नाबालिकालाई सिटी चालक अरमानले ललाइफकाइ रंगेली नगरपालिका–७ स्थित युमी क्याफेमा लगेर विभिन्न प्रलोभनमा पारी जबरजस्ती करणी गरेको आरोप छ। त्यसपछि सोही क्याफेका सञ्चालक सुमनकुमार साहले समेत जबरजस्ती करणी गरेको पीडितको उजुरीमा उल्लेख छ।
त्यसैगरी, साउन ४ गते राति करिब ९ बजे करण मण्डलले पीडितलाई रंगेली नगरपालिका–७ स्थित संसारी मन्दिर नजिकै रहेको ‘द ९०एस’ क्याफेमा लगेको र त्यहाँ प्रियान्सु साह तथा रितिक यादवसमेतले सामूहिक रूपमा जबरजस्ती करणी गरेको आरोप छ।
पीडितको उजुरीका आधारमा जिल्ला प्रहरी कार्यालय मोरङ र इलाका प्रहरी कार्यालय रंगेलीबाट संयुक्त रूपमा खटिएको प्रहरी टोलीले साउन १० गते दिउँसो करिब ४ः१० बजे पाँचै जनालाई पक्राउ गरेको हो।
पक्राउ परेकाहरूमाथि इलाका प्रहरी कार्यालय रंगेलीबाट थप अनुसन्धान भइरहेको जिल्ला प्रहरी कार्यालय मोरङले जनाएको छ।
