काठमाडाैँ । गैंडाकोट नगरपालिका–१० स्थित अकलामाई मन्दिर नजिक अचेत अवस्थामा फेला परेका दुई महिलाको मृत्यु भएको छ।
मृत्यु हुनेमा बागलुङको जैमिनी नगरपालिका–९ घर भई हाल गैंडाकोट नगरपालिका–१२ हर्कपुरमा डेरा गरी ज्याला मजदुरी गर्दै आएकी ३८ वर्षीया कविता राई र भोजपुर घर भई गैंडाकोट नगरपालिका–१० पितौजीस्थित गाई फार्ममा काम गर्दै आएकी करिब ४५ वर्षीया कान्छी राई रहेका छन्।
पूर्व–पश्चिम राजमार्गको बायाँपट्टि अकलामाई मन्दिर नजिकको चौरमा दुई महिला अचेत अवस्थामा रहेको सूचना पाएपछि प्रहरी टोली घटनास्थल पुगेको थियो। प्रहरीले दुवैलाई उद्धार गरी तत्काल भेडाबारीस्थित नगर अस्पताल पुर्याए पनि उपचारका क्रममा चिकित्सकले मृत घोषणा गरेका हुन्।
प्रहरीका अनुसार घटनास्थलबाट बियरका बोतल र कुरमुरेका प्याकेट फेला परेका छन्। मृतक दुवैको शरीरमा बाह्य चोटपटक नदेखिएको प्रहरीले जनाएको छ। घटनाको कारण खुल्न नसकेको र थप अनुसन्धान भइरहेको प्रहरीले जनाएको छ।
