काठमाडौं । स्वास्थ्य तथा खाद्य स्वच्छता मन्त्री निशा मेहताले सुनसरीको देवानगञ्जमा भएको घटनाप्रति दुःख व्यक्त गर्दै शान्ति, संयमता र सामाजिक सद्भाव कायम राख्न सबैमा अपिल गर्नुभएको छ।
मन्त्री मेहताले घटनामा ज्यान गुमाएकाहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गर्नुभएको छ। उहाँले घाइतेहरूको शीघ्र स्वास्थ्यलाभको कामना गर्दै उपचारका लागि आवश्यक समन्वय भइरहेको जानकारी दिनुभएको छ।
घटनाबारे जानकारी प्राप्त हुनासाथ सम्बन्धित सुरक्षा निकाय तथा प्रशासनसँग सम्पर्क गरी घटनास्थलको अवस्था नियन्त्रणमा लिन, घाइतेहरूको उपचारको व्यवस्था मिलाउन र शान्ति सुरक्षा कायम गर्न आवश्यक समन्वय सुरु गरिएको मन्त्री मेहताले बताउनुभएको छ।
उहाँले संवेदनशील परिस्थितिमा कुनै पनि अपुष्ट सूचना तथा अफवाहको पछि नलाग्न आग्रह गर्दै सामाजिक सद्भाव र आपसी भाइचारामा असर पार्ने गतिविधिबाट टाढा रहन नागरिकलाई अपिल गर्नुभएको छ।
सम्बन्धित निकायबाट घटनाको निष्पक्ष छानबिन गरी यथाशीघ्र सत्यतथ्य सार्वजनिक हुने विश्वास व्यक्त गर्दै मन्त्री मेहताले कठिन परिस्थितिमा सबै पक्षलाई धैर्य, संयमता र जिम्मेवारीका साथ प्रस्तुत भई शान्ति कायम गर्न सहयोग गर्न आग्रह गर्नुभएको छ।
