जेनेभा। प्रजातान्त्रिक गणतन्त्र कङ्गोमा घातक इबोलाको प्रकोप द्रुत गतिमा फैलिरहेको विश्व स्वास्थ्य सङ्गठनले शुक्रबार बताएको छ ।
डब्ल्यूएचओले भनेको छ, “सङ्गठनले अझै पनि उत्तरपूर्वी डीआरसीलाई घेर्ने बिग्रँदो अवस्थालाई नियन्त्रण गर्न सङ्घर्ष गरिरहेको छ ।”
विश्व स्वास्थ्य सङ्गठनका अफ्रिका आपतकालिन प्रमुख मेरी रोजलिन बेलिजेयरले भन्नुभयो, “प्रकोप अझै पनि गम्भीर छ र यो तीव्र गतिमा फैलिइरहेको छ ।”
“मैले यस्तो अवस्था देखेको छु जुन हरेक दिन विकराल हुँदै गएको छ,” उहाँले जेनेभा भेला भएका पत्रकारहरूलाई जानकारी दिँदै डिआरसीको इतुरी प्रान्तको राजधानी बुनियाबाट भन्नुभयो ।
प्रजातान्त्रिक गणतन्त्र कङ्गोमा इबोला सङ्क्रमण फैलिएको हल्लाका बावजुत पनि केही समयसम्म सङ्क्रमण पत्ता लागेको थिएन तर मे १५ मा इबोला सङ्क्रमणको प्रकोपको घोषणा गरिएको थियो ।
यो भाइरसको सङ्क्रमण दुर्लभ ‘बुन्डिबुग्यो स्ट्रेन’को कारण हुन्छ, जसको उपचारको लागि कुनै खोप छैन ।
डब्ल्युएचओको पछिल्लो अपडेट अनुसार कङ्गोमा अहिलेसम्म ८९६ व्यक्तिमा सङ्क्रमण पुष्टि भएको छ भने यसमध्ये २३२ जनामा सङ्क्रमित व्यक्तिको मृत्यु भएको छ। शुक्रबारसम्मको पछिल्लो २४ घण्टामा थप २१ जनामा नयाँ सङ्क्रमण पुष्टि भएको छ ।
कङ्गोमा अस्पतालमा पुगेका ज्ञात सङ्क्रमितमध्ये ९० प्रतिशत भन्दा बढी द्वन्द्वग्रस्त प्रान्त इतुरीमा छन् ।
यो प्रकोप उत्तरी किभु र दक्षिण किभु प्रान्तहरूमा पनि फैलिएको छ ।
बेलिजेयरले भन्नुभयो, “महामारी निकै छिटो फैलिइरहेको छ डब्ल्युटिओले भाइरसलाई नियन्त्रणमा राख्न बेजोड पहलहरू गरिरहेको छ । यो भाइरस निकट सम्पर्क र सङ्क्रमित व्यक्तिको शरिरबाट निस्कने तरल पदार्थका माध्यमबाट सर्छ।”
इबोलाका बिरामीहरूका लागि उपलब्ध उपचार शैयाहरूको सङ्ख्या शून्यबाट ५०० भन्दा बढी पुगेको उहाँले बताउनुभयो ।
निगरानी टोलीहरूले अब लगभग ४०० सम्भावित सङ्क्रमित व्यक्तिको अवस्थाबारे अनुसन्धान गरिरहेका छन् । “आफूहरूले एक दिनमा दुई हजारभन्दा बढी परीक्षणहरू गर्न सक्षम छन्,” उहाँले भन्नुभयो ।
बेलिजाइरले भन्नुभयो, “सम्पर्कमा स्वास्थ्य संस्था तथा शिविरहरूमा दर्ता भएका ज्ञात इबोला सङ्क्रमितको सम्पर्क पत्ता लगाउने प्रयासहरू तीव्र भएका छन्, सबै सम्पर्कहरूको ७५ प्रतिशतमा टोली अहिले पुगिसकेको छ ।”
डब्लुएचओले ९५ प्रतिशत सम्पर्कमा आएका व्यक्तिको पहिचान गरी सङ्क्रमण फैलिनुबाट रोक्नुपर्ने बताएको छ ।
छिमेकी देश युगान्डामा दुई जनाको मृत्यु भएको र १० जना निको भएका छन् ।
युगान्डामा विगत १२ दिनदेखि कुनै नयाँ सङ्क्रमित फेला परेका छैनन् । (रासस/एएफपी)
