काठमाडौँ। राष्ट्रिय जनमोर्चाले संविधान संशोधन बहसका लागि महिला र दलित समुदायलाई छुट्टै निर्वाचन क्षेत्र निर्धारण गर्न अवधारणापत्र तयार गरेको छ ।
सो पार्टी निटकको अखिल नेपाल महिला सङ्घ तथा जातीय समता समाज केन्द्रीय समितिको संयुक्त आयोजनामा आज यहाँ भएको अन्तरक्रियामा पार्टीका महासचिव मनोज भट्टद्वारा प्रस्तुत अवधारणापत्रमा महिला र दलित समुदायलाई छुट्टै निर्वाचन क्षेत्र निर्धारण गर्न प्रस्ताव गरिएको हो ।
नेपाल सरकारले संविधान संशोधनका लागि बहसपत्र निर्माण कार्यदल गठन गरेको सन्दर्भमा विद्यमान प्रत्यक्ष र समानुपातिक गरी मिश्रित प्रकारको निर्वाचन प्रणालीको कायम राख्न तथा महिला र दलित समुदायका लागि छुट्टै निर्वाचन क्षेत्र निर्धारण गर्न सो पार्टीको माग रहेको छ ।
नेपालमा दलित र महिलाले जातीय तथा वर्गीयरूपले युगौँदेखि समाज वा राज्य दुवैबाट दोहोरो उत्पीडन व्यहोर्नुपरेको अवस्थामा महिला तथा दलित समुदायलाई छुट्टै निर्वाचन क्षेत्र निर्धारण गर्दा उनीहरूप्रतिको सम्मान र विगतका भोगेका पीडाको क्षतिपूर्ति हुने महासचिव भट्टको भनाइ छ । रासस
