काठमाडौं। स्वास्थ्य तथा खाद्य स्वच्छता मन्त्रालयको संगठन तथा व्यवस्थापन अध्ययन सम्पन्न भई संघीय पुल अन्तर्गत कुल १,८०८ दरबन्दी स्वीकृत भएको छ। भूमि व्यवस्था, सहकारी, संघीय मामिला तथा सामान्य प्रशासन मन्त्रालयबाट अन्तिम स्वीकृति प्राप्त भई दरबन्दी संरचना औपचारिक रूपमा मन्त्रालयमा हस्तान्तरण गरिएको हो।
मन्त्रालयका अनुसार स्वीकृत दरबन्दीमध्ये हाल कायम रहेका ८३१ दरबन्दीमा थप ९७७ नयाँ दरबन्दी थपिएर कुल १,८०८ दरबन्दी कायम गरिएको छ। यससँगै स्वास्थ्य सेवा क्षेत्रमा जनशक्ति विस्तारको प्रक्रिया अघि बढ्ने भएको छ।
स्वीकृत दरबन्दीका आधारमा अब लोक सेवा आयोगमार्फत चरणबद्ध रूपमा खुला पदपूर्ति प्रक्रिया सुरु गरिने मन्त्रालयले जनाएको छ। आवश्यक प्रक्रिया पूरा गरी रिक्त पदहरूमा प्रतिस्पर्धात्मक परीक्षामार्फत कर्मचारी भर्ना गरिने तयारी गरिएको छ।
मन्त्रालयले विभिन्न विधाका विशेषज्ञ चिकित्सकहरूको दरबन्दीमा उल्लेखनीय वृद्धि गरिएको जनाएको छ, जसले स्वास्थ्य सेवाको गुणस्तर सुधार गर्न सहयोग पुग्ने अपेक्षा गरिएको छ।
यसैबीच, मन्त्रालयले यो स्वीकृत सूची संघीय पुल दरबन्दीको संरचनासँग सम्बन्धित मात्र रहेको स्पष्ट पारेको छ। सिएमए, अहेब, अनमी लगायत प्राविधिक तथा सहयोगी तहका स्वास्थ्यकर्मीहरूको हकमा प्रदेश र स्थानीय तहहरूमा निकट भविष्यमा ठूलो संख्यामा दरबन्दी खुल्ने तयारी भइरहेको जानकारीसमेत मन्त्रालयले दिएको छ ।
