काठमाडौं । काठमाडौं उपत्यकाभित्र चोरीका घटना क्रमबद्ध रुपमा बढ्न थालेका छन् । दैनिकजसो राजधानीमा चोरहरुले मौका छोपेर चोरी गर्ने गरेका छन् । यसैक्रममा शनिबार राति नागार्जुन नगरपालिका–४, सीतापाइलाथिस्त एक घरमा पनि पाँच लाख रुपैयाँ बराबरको धनमाल चोरी भएको छ ।
नागार्जुन–४ स्थित कुमारी मन्दिर नजिकै गोविन्द केसीको घरमा चोरी भएको महानगरीय प्रहरी वृत्त स्वयम्भुका डीएसपी लालध्वज सुवेदीले बताए । राति १ बजेतिर चोरले दुईवटा आइफोन, एउटा ल्यापटप लगायतको सामान चोरी गरेको डीएसपी सुवेदीले जानकारी दिए ।
आइतबार बिहान प्रहरीले चोरी भएको घरमा पुगेर अनुसन्धान थालेको छ । चोरहरुको खोजी भइरहेको प्रहरीले जनाएको छ ।
