मूल्य अभिवृद्धि करका झुट्टा तथा नक्कली विजकको प्रयोग गरी राजस्व छली गरेको अभियोगमा पाँच वटा फर्म र ५ जना व्यक्ति विरुद्ध राजस्व अनुसन्धान विभागद्वारा काठमाडौं जिल्ला अदालतमा मुद्दा दायर गरिएको छ । उनीहरुमाथी रु ९ करोड ३९ लाख ३३ हजार १ सय दश को विगो र विगोको दोब्बरसम्म जरिवाना र ३ वर्ष कैद सजायको माग दावी गरी काठमाण्डौ जिल्ला अदालतमा मुद्दा दायर भएको हो ।
हाल काठमाण्डौ महानगरपालिका ३२ वस्ने स्थायी घर काभ्रेपलाञ्चोक भएका एस.पी. इन्टरप्राइजेज/हिमाल कन्सट्रक्सनका प्रोपाईटर शिव प्रसाद गौतम विरुद्ध रु ३ करोड ८१ लाख २९ हजार ६ सय दश र पाँचखालका वाटरमार्क इन्टरप्राइजेजका प्रोप्राईटर शिवराम न्यौपानेलाई १ करोड ५९ लाख ९४ हजार ५ सय सत्र रुपैँयाको विगो कायम गरि मुद्दा दायर गरिएको छ ।
यसैगरी मण्डनदेउपुर नगरपालिकाका न्यू हिमालयन ईन्टरप्राईजेजका प्रोपाईटर लक्ष्मण चौलागाईलाई रु ६९ लाख ३९ हजार ६ सय नब्बे, काभ्रेपलान्चोकका न्यू युनिभर्सल इन्टरप्राइजेजका प्रोपाईटर सदर्शन चौलागाईलाई रु ३० लाख ३२ हजार १ सय छब्बीस् र रामेछापका आर्जन हार्डवेयर सप्लायर्स प्रा.लि. को संञ्चालक देव बहादुर खत्रीलाई रु २ करोड ९८ लाख ३७ हजार १ सय चौबिस रुपैँयाको विगो कायम गरि उनीहरु विरुद्ध राजस्व अनुसन्धान विभागले मुद्दा दायर गरेको हो ।
उनीहरुले वस्तु तथा सेवा खरिद नै नगरी झुठ्ठा तथा नक्कली मूल्य अभिवृद्धि कर विजक मात्र खरिद गरी मूल्य अभिवृद्धि कर र आयकर समेतको राजस्व चुहावटको कसूर गरेको देखिएको हो ।
