काठमाडौँ। नेपाली काँग्रेसका सांसद कृष्णप्रसाद सिटौलाले कर्मचारीको ट्रेड युनियन अधिकार खारेज गर्ने सरकारको कदम कुनैपनि हालतमा सफल हुन नदिने चेतावनी दिनुभएको छ ।
राष्ट्रिय सभाको बिहीवारको बैठकमा बोल्दै सांसद सिटौलाले सरकारले ट्रेड युनियन अधिकार खारेज गर्न खोजेको खण्डमा त्यसविरुद्ध प्रतिपक्ष एकजुट भएर उभिने चेतावनी दिनुभयो ।
उहाँले ट्रेड युनियनको अधिकार संविधानप्रदत्त भएकाले कुनैपनि हालतमा त्यसलाई समाप्त गर्ने प्रयास स्वीकार्य नहुने बताउनु भयो ।
उहाँले ट्रेड युनियन आन्दोलन र श्रमिक आन्दोलनले लोकतान्त्रिक अधिकार स्थापनामा महत्वपूर्ण भुमिका खेलेको स्मरण गर्दै श्रमिकहरुले आफ्नो आवाज उठाउने अधिकार कसैले खोस्न नसक्ने बताउनु भयो । सिटौलाले सरकारले संविधानअनुसार काम गरोस् भन्ने प्रतिपक्षको चाहना रहेपनि गलत कदमविरुद्ध भने कडा प्रतिरोध हुने स्पष्ट पार्नुभयो ।
उहाँले भन्नुभयो, ‘टे«ड युनियनको अधिकार नेपालको संविधानले दिएको छ । यसलाई खरोज गर्ने कुरा कुनैपनि हालतमा स्वीकार गर्न सकिँदैन । सरकारले अध्यादेशमार्फत टे«ड युनियन खारेज गर्न ल्याएको अध्यादेशको विषयमा सर्वोच्च अदालतले अन्तरिम आदेश समेत दिइसकेको अवस्था छ ।
नेपालको राजनीति आन्दोलन र श्रमिक आन्दोलनको अत्यन्त महत्वपूर्ण भूमिका रहेको छ । उनीहरुले आफ्नो आवाज उठाउन सक्छन् । हामी ती युनियनको खारेज गर्ने सरकारको कार्यलाई कुनैपनि आधारमा सफल हुन दिँदैनौँ ।
यहाँ हामी सबै प्रतिपक्षी दलका नेताहरु मात्र छौँ । तर सरकारले संविधानबमोजिम काम गर्न सकोस् भन्ने विचार रहन्छ । तर सरकारका गलत कुराहरु रोक्न पनि चाहान्छौँ ।’
उहाँले ट्रेड युनियन खारेज गर्ने सरकारी प्रयास कुनैपनि आधारमा सफल हुन नदिने चेतावनी दिनुभयो ।–न्युज एजेन्सी नेपाल
