काठमाडाैँ । स्याङ्जाको पुतलीबजार क्षेत्रमा मोटरसाइकलमा लिफ्ट दिने बहानामा एक महिलामाथि अश्लील हर्कत गरेको आरोपमा एक युवक पक्राउ परेका छन्।
जिल्ला प्रहरी कार्यालय स्याङ्जाका अनुसार मंगलबार बिहान करिब ७ बजे पुतलीबजार नगरपालिका–१ मलेबगरस्थित एकान्त सडक खण्डमा मोटरसाइकलमा लिफ्ट दिएका ती युवकले पीडितसँग फोन नम्बर मागेका थिए। नम्बर दिन अस्वीकार गरेपछि उनले अश्लील व्यवहार गरेको भन्दै पीडितले प्रहरीमा जाहेरी दिएकी थिइन्।
उक्त जाहेरीका आधारमा खटिएको विशेष अपरेशन टोलीले घटनापछि फरार हुँदै गरेको अवस्थामा पुतलीबजार नगरपालिका–१ बाट २० वर्षीय दिवस सुनारलाई पक्राउ गरेको हो। उनी पुतलीबजार नगरपालिका–९ निवासी हुन्।
प्रहरीले पक्राउ परेका सुनारमाथि थप अनुसन्धान तथा कानुनी कारबाही प्रक्रिया अघि बढाएको जनाएको छ।
यसैबीच, जिल्ला प्रहरी कार्यालय स्याङ्जाले अपरिचित व्यक्तिको मोटरसाइकलमा लिफ्ट नलिन तथा सतर्क रहन सम्पूर्ण महिला दिदीबहिनीहरूलाई आग्रह गरेको छ।
