काठमाडौँ । प्रतिनिधि सभा सञ्चालनका लागि नयाँ नियमावली तयार पार्न गठित मस्यौदा समितिभित्र सहमति जुट्न नसकेको बताइएको छ। समितिका सदस्य तथा नेकपा (एमाले) सांसद ऐन महरले सत्तापक्ष सहमतिभन्दा संख्यात्मक बलमा अघि बढ्न खोजेको आरोप लगाएका छन्।
राष्ट्रिय स्वतन्त्र पार्टीका सांसद गणेश पराजुलीको सभापतित्वमा गठन भएको समितिले नियमावली पुनरावलोकनको काम गरिरहेको छ। महरका अनुसार करिब ५० प्रतिशत विषयमा सहमति भइसके पनि बाँकी विषयमा मतभेद कायमै छ।
उनले संसदलाई थप लोकतान्त्रिक, पारदर्शी र जनउत्तरदायी बनाउने उद्देश्यसहित छलफल भइरहेको बताए। तर, प्रारम्भिक सहमतिविपरीत सत्तापक्ष व्यवहारमा उदार नदेखिएको उनको भनाइ छ।
महरले विशेषगरी शून्य समय, विशेष समय र आकस्मिक समयलाई व्यवस्थित बनाउने प्रस्तावमा विवाद देखिएको बताए। हाल शून्य समयमा सांसदलाई एक मिनेट मात्र बोल्न दिइने व्यवस्था अपर्याप्त भएको भन्दै समय बढाउनुपर्ने माग प्रतिपक्षको छ। यस्तै, आकस्मिक समय प्रयोग गर्न पूर्वअनुमतिको प्रावधान हटाउनुपर्ने प्रस्तावमा पनि सहमति जुट्न सकेको छैन।
उनले सांसदहरूले उठाएका प्रश्नमा सम्बन्धित मन्त्री वा प्रधानमन्त्रीको अनिवार्य उपस्थितिमा तत्काल जवाफ दिने व्यवस्था गर्नुपर्नेमा जोड दिए।
महरका अनुसार संसद केवल विधेयक पारित गर्ने थलो नभई जनताको भावना र माग व्यक्त गर्ने सर्वोच्च राजनीतिक मञ्च हो। “संख्याको बलमा संसद चलाउन खोजिए प्रतिपक्षले सशक्त प्रतिवाद गर्छ,” उनले चेतावनी दिए।
समितिले हाल विद्यमान २०७९ सालको नियमावलीलाई आधार बनाएर पुनरावलोकन गरिरहेको छ भने सहमति नजुटेका विषयलाई थाती राख्दै छलफल अगाडि बढाइएको जनाएको छ।
