काठमाडौँ। इन्डियन प्रिमियर लिग (एनपिएल ) मा लखनऊ सुपर जायन्ट्स ले रोमाञ्चक जित निकालेको छ। लखनऊले कोलकाता नाइट राइडर्स लाई ३ विकेटले हरायो।
इडेन गार्डेनमा बिहीबार राति भएको अन्तिम बलसम्मको प्रतिष्पर्धामा मुकुल चौधरीले विष्फोटक ब्याटिङ गरेपछि कोलकाता घरेलु मैदानमै स्तब्ध बनेको हो ।
कोलकातास्थित इडेन गार्डेनमा टस हारेर पहिले ब्याटिङको निम्तो पाएको कोलकता नाइट राइडर्सले निर्धारित २० ओभरमा ४ विकेटको क्षतिमा १८१ रन बनाएको थियो। जवाफी ब्याटिङमा आएको लखनउ सुपर जायन्ट्सले ७ विकेटको क्षतिमा अन्तिम ओभरको अन्तिम बलमा लक्ष्य पूरा गर्दै जित दर्ता गरेको हो।
लखनउको जितका नायक बनेका मुकुल चौधरीले मात्र २७ बलमा २ चौका र ७ छक्काको मद्दतले अविजित ५४ रन बनाए । उनले अन्तिम ओभरमा आवश्यक १४ रन बनाउँदै टोलीलाई महत्वपूर्ण दुई अंक दिलाए । लखनउका लागि आयुष बदोनीले ५४ र एडेन मार्करमले २२ रनको योगदान दिएका थिए ।
बलिङतर्फ कोलकाताका वैभव अरोरा र अनुकुल रोयले २–२ विकेट लिए पनि अन्तिम ओभरमा रन रोक्न नसक्दा हार बेहोर्नुपर्यो ।
यसअघि कोलकाताका लागि अंगकृष रघुवंशीले सर्वाधिक ४५ रन बनाए भने कप्तान अजिंक्य रहाणेले ४१ रनको योगदान दिए । त्यस्तै, रोभम्यान पावेलले ३९ र क्यामरुन ग्रीनले ३२ रन जोडे पनि त्यो स्कोर जितका लागि पर्याप्त हुन सकेन ।
लखनउका दिगभेष राठी, मनिमारन सिद्धार्थ र आवेश खानले १–१ विकेट लिए । आक्रामक ५४ रन जोडेका लखनउका मुकुल चौधरी ‘प्लेयर अफ द म्याच’ घोषित भए ।
यो जितसँगै पाँचौं स्थानको लखनउले तीन खेलबाट चार अंक जोडेको छ। कोलकाता भने चार खेल खेल्दा एक अंकसहित नवौं स्थानमा छ ।
