काठमाडौं । करिब दुई हप्ता अघि अमेरिकी सहयोगमा इजरायलले इरानमाथि आक्रमण गरेर सुरु भएको मध्यपूर्वी युद्ध समाधान होला भन्दा झन् फैलँदै गएको छ । इजरायलले इरानमा हमला गरेपछि इरानले पनि मध्यपूर्वी देशहरु युएइ, कतार, बहराइन, साउदी अरेबियामा आक्रमण गरिरहेको छ ।
यसबाट थप चर्कँदै गएको युद्ध अहिले आएर लेबनानतिर सोझिएको छ । लेबनानको राजधानी बेरुतका दक्षिणी शहरहरूमा हिजोदेखि इजरायलले नयाँ आक्रमण गरेको छ ।
लेबनानी सरकारी सञ्चारमाध्यमले जनाए अनुसार ती सहरहरुमा भएको शक्तिशाली हमलाका कारण त्यहाँ भौतिक तथा मानवीय क्षति भएको अनुमान पनि गरिएको छ । तर त्यसको यकिन विवरण भने आइसकेको छैन ।
इजरायली सेनाले भने आफूले इरान समर्थित समूह हिजबुल्लाहलाई लक्षित लेबनानको राजधानी बेरुत र टायर शहरमा आक्रमण गरेको जनाएको छ । यसअघि इजरायली सेनाले टायर र सिडोनमा आक्रमण गर्ने चेतावनी दिँदै त्यहाँका बासिन्दालाई तुरुन्तै घर खाली गरेर कम्तीमा ३०० मिटर टाढा जान आग्रह गरेको थियो ।
अमेरिका–इजरायल संयुक्त आक्रमणमा इरानका सर्वोच्च नेता अलि खामेनी मारिएका छन् । त्यसको बदलास्वरुप हिज्बुल्लाहले इजरायलमाथि पनि आक्रमण गरेको छ । त्यसपछि पछिल्लो हप्ता आएर लेबनान पनि मध्यपूर्वको युद्धमा तानिएको छ ।
फोटो -रासस/ एफपी
