काठमाडौँ । सानोथिमि स्थित बाल सुधारगृहमा बाक्लो संख्यामा प्रहरी परिचालन गरिएको छ ।
बिहीबार राति बाल सुधारगृहमा दुई समूह बिच झडप हुँदा त्यहाँको अवस्था तनावग्रस्त बनेको थियो । झडपपछि उनीहरुले आगजनी र तोडफोड गरेका थिए । आगो नियन्त्रण गर्न भक्तपुर र काठमाडौँका वारुणयन्त्र परिचालन गरिएको थियो ।
दुई समूह बिच झडप हुँदा नियन्त्रणकाका लागि थिमि प्रहरी वृत्तका प्रमुखको नेतृत्वमा टोली परिचालन गरिएको थियो । पछि प्रहरी टोलीमाथि नै ढुङ्गामुढा भएपछि स्थिति नियन्त्रण बाहिर गएको थियो ।
अहिले स्थिति नियन्त्रणमा आएको भए पनि त्यहाँ बाक्लो सङ्ख्यामा उपस्थित सुरक्षाकर्मीले निगरानी गरिरहेका छन् ।
सुधारगृहमा भएको क्षतिको विवरण आउन बाँकी रहेको थिमि प्रहरी वृत्तले जनाएको छ । उक्त गृहमा १४५ पुरुष र २४ महिला गरी १६९ जना छन् ।
