काठमाडौं । चिसो मौसम जारी छ । आकाश सफा र हल्का कुहिरोमय छ । जसले हिमालका टाकुराहरू स्पष्ट देखिन्छन् । यस्तो मनमोहक मौसममा नेपालको पर्यटन झनै आकर्षक बन्दै गएको छ ।
पर्यटकहरु विश्वसम्पदा सूचिमा सूचिकृत स्वयम्भूनाथबाट काठमाडौं उपत्यका नियाल्दै छन् । हिमालको काखमा लुकेको यो उपत्यका, पुराना मन्दिरहरूले सजिएको शहर, चिसो हावामा मिसिएको शान्ति र रहस्य, स्वयम्भूका आँखाबाट पर्यटकहरुले सदियौंदेखि यो सौन्दर्य हेरिरहेका छन् ।
यो स्थान आत्माको शान्ति र प्रकृतिको महिमा गाउने ठाउँ हो । आजको यो चिसो तर सफा मौसममा, घामको किरणले स्तुपको सुनौलो गजुर चम्किरहेको छ । तल उपत्यकामा घरहरूको लहर, दूर हिमशृङ्खला र आकाशमा उड्ने चराहरू – सबै मिलेर एउटा अद्भुत चित्र कोरिरहेका छन् ।
यहाँ विभिन्न देशका विदेशी पर्यटकहरू उत्साहित छन् । जाडो याममा पनि विदेशी पर्यटकहरूको आगमन बढ्दो छ । स्वयम्भूनाथजस्ता स्थानहरूले नेपालको सांस्कृतिक र प्राकृतिक सौन्दर्यलाई विश्वभरि चिनाउँदैछन् । यो चिसो मौसमले पर्यटकहरूलाई न्यानो स्वागत गरिरहेको छ ।
काठमाडौं मात्र नभई उपत्यकाकै धार्मिक, सांस्कृतिक र ऐतिहासिक महत्वको परिचायक स्वयम्भू बौद्धमार्गीको आस्थाको केन्द्रमात्रै होइन, यहाँ सबै धर्मावलम्बीको उत्तिकै घुइँचो लाग्छ ।अझ काठमाडौं घुम्न आउने आन्तरिक एवम् बाह्य पर्यटकहरूको स्वयम्भू नघुमी घुमफिर तथा देशाटन पूर्ण हुँदैन ।
तस्बिरहरुः अनुप प्रधान/न्युज एजेन्सी नेपाल
