काठमाडौँ । नेपाली कांग्रेसको केन्द्रीय कार्य समितिको बैठक पार्टी केन्द्रीय कार्यालय सानेपामा सुरु भएको छ।
बैठकमा आगामी पुस अन्तिम सातामा बस्ने कांग्रेसको १५औँ महाधिवेशनको कार्यतालिका पेस गर्ने तयारी गरिएको पार्टी स्रोतले जनाएको छ।
महाधिवेशनको मिति र प्रक्रिया सम्बन्धी कार्यतालिकामा सबै तहमा सहमति बनिरहेको नेतृत्वले दाबी गरेका छन्।
विशेषतः प्रतिनिधिसभा निर्वाचन फागुन २१ गतेपछि महाधिवेशन गर्नुपर्ने अडान लिँदै आएका पूर्वउपसभापति विमलेन्द्र निधि र पूर्वमहामन्त्री कृष्णप्रसाद सिटौला पनि पुसमै महाधिवेशन गर्ने मध्यमार्गी प्रस्तावमा सहमत भएको बताइएको छ।
गत मंसिर ६ गतेदेखि महाधिवेशनको मिति टुंगो नलागेपछि कांग्रेसका बैठकहरू निरन्तर सर्दै आएका थिए। अब भने नेताहरूबीच सहमति जुट्दै गएपछि पुस अन्तिम सातामा महाधिवेशन आयोजनाका लागि केन्द्रीय समितिमा औपचारिक प्रस्ताव पेस गरिँदैछ।
