काठमाडौं । विशेष अदालत काठमाडौंले बालुवाटारस्थित ललिता निवास क्याम्प क्षेत्रको सरकारी जग्गा बिक्री प्रकरणमा मुछिएका पहिलो प्रतिवादीलाई थुनामा पठाएको छ । अख्तियार दुरुपयोग अनुसन्धान आयोगले मुद्दा दायर गरेपछि पहिलो अदालतमा उपस्थित भएका डिल्लीबजार मालपोत कार्यालयका अधिकृत कृष्णप्रसाद पौडेललाई थुनामा पठाएको हो । विशेष अदालतका अध्यक्ष न्यायाधीशद्वय शिवराज अधिकारी र चन्द्रबहादुर सारुको इजलासले अभियुक्त पौडेललाई सोमबार पुर्पक्षका लागि थुनामा पठाउन आदेश दिएको छ । आयोगले पौडेलविरुद्ध ३२ करोड १९ लाख २० हजार बिगो दाबी मुद्दा चलाएको थियो ।
उनीविरुद्ध ८ देखि १० वर्षसम्म कैद सजाय हुनुपर्ने माग अख्तियारले गरेको छ । ललिता निवास प्रकरणमा अदालत उपस्थित भएका पहिलो प्रतिवादी पौडेललाई थुनामा पठाउने आदेश भएको विशेष अदालतका प्रवक्ता पुष्पराज पाण्डेले बताए । पौडेललाई १५ दिनभित्र अदालमा उपस्थित हुन म्याद जारी भएपछि उनी सोमबार अदालतमा बयान दिन उपस्थित भएका थिए । सोमबार नै भएको थुनछेक बहसपछि पौडेललाई थुनामा पठाउन आदेश दिएको विशेष अदालतका सूचना अधिकारी इन्द्रबहादुर खड्काले जानकारी दिए । अदालतले म्याद जारी गरेका ७४ जनामध्ये पौडेल अदालतमा उपस्थित हुने पहिलो व्यक्ति हुन् ।
विशेष अदालतले पहिलो प्रतिवादीसँग धरौटी नमागी थुनामा पठाएपछि अरूमाथि पनि यस्तै आदेश आउने सम्भावना बढेको कतिपय कानुनविद्को बुझाइरहेको छ । ललिता निवासको जग्गा बिक्री प्रकरणमा तत्कालीन मन्त्री एंव नेपाली कांग्रेसका उपसभापति विजयकुमार गच्छदारसहित १७५ जनाविरुद्ध भ्रष्टाचार मुद्दा चलाइएको छ । आयोगले गत माघ २२ गते गच्छदारसहित तीनवजना पूर्वमन्त्री, तीनजना पूर्वसचिव र अवकाशप्राप्त तथा बहालवाला कर्मचारीसहित १७५ जना विरुद्ध भ्रष्टाचार मुद्दा चलाएको थियो । सौर्य दैनिक
