काठमाडौं। एएफसी महिला एसियन कप २०२६ को छनोट अन्तर्गत समूह ‘एफ’ मा भएको खेलमा नेपाल उज्बेकिस्तानसँग २–० गोलले पछि परेको छ।
खेल सुरु भएको दोस्रो मिनेटमै उज्बेकिस्तानले पहिलो गोल गर्दै अग्रता बनायो। त्यसपछि ११ औं मिनेटमा दोस्रो गोल थप्दै नेपालमाथि दबाब कायम राख्यो।
यो खेल जित्ने टोलीले एसिया कप २०२६ का लागि छनोट हुने भएकाले दुबै टोलीबीच कडा प्रतिस्पर्धा भइरहेको छ। नेपालले यसअघि श्रीलंकाविरुद्ध खेलेको टोलीमा एक परिवर्तन गर्दै आजको खेलमा मिडफिल्डर पूजा रानालाई प्रीति राईको स्थानमा मैदानमा उतारेको हो।
गोलकिपरको भूमिकामा अन्जना रानामगर छिन् भने रक्षापंक्तिमा समीक्षा घिमिरे, गीता राना र निशा थोकर रहेका छन्। मिडफिल्डमा पूजा राना, रेनुका नगरकोटे, सरस्वती हमाल, सबिता रानामगर र अनिता बस्नेतले टोली सम्हालेका छन्।
आक्रमणको अग्रपंक्तिमा अनुभवी स्ट्राइकर साबित्रा भण्डारीलाई रश्मी घिसिङले साथ दिएकी छन्। नेपालले दोस्रो हाफमा गोल फर्काउने प्रयास गरिरहेको छ, तर उज्बेकिस्तानको बलियो सुरक्षापंक्तिले चुनौति दिइरहेको छ।
