म्यानमारको सेनाद्वारा सञ्चालित अदालतले गत फेब्रुअरीमा सत्ताच्युत नेत्री आङ सान सुकीलाई कम्तीमा तीनवटा आरोपमा दोषी ठहर गर्दै थप चार वर्षको जेल सजाय सुनाएको छ।
सेनाले करिब एक वर्ष पहिले देशको नियन्त्रण कब्जा गरेपछि ७६ वर्षीया नोबेल शान्ति पुरस्कार विजेता सुकीलाई हिरासतमा राखेको थियो र दर्जनौँ आरोप लगाएको थियो । आलोचकहरूले राजनीतिकरूपमा प्रेरित भएको बताएका छन् ।
सुकीलाई बिना इजाजत वाकीटकी राखेकामा दुई वर्ष र कोरोना भाइरस प्रोटोकल उल्लङ्घन गरेकामा दुई वर्षको सजाय सुनाएको छ। सुकीमाथि बन्द अदालतमा मुद्दा चलिरहेको छ र आरोपमा अधिकतम १०० वर्ष जेल सजाय माग गरिएको छ। सुकीले सबै आरोप अस्वीकार गर्नुभएको छ ।
सुकीलाई गत महिना ‘उत्तेजना’ र कोभिड–१९ प्रोटोकलहरू उल्लङ्घन गरेकोमा दोषी ठहर गरिएको थियो र चार वर्षको जेल सजाय दिइएको थियो । पछि प्रजातान्त्रिक सरकार अपदस्थ गर्ने सेनाका नेता म्यान आङ ह्लाङले माफी दिइएको भनी चित्रण गरिएको थियो।
डिसेम्बरमा सरकारी टेलिभिजनले सो सजाय सुकीको ‘हालको नजरबन्द’ स्थानमा लागू हुने बताएको थियो। सुकीलाई कहाँ राखिएको छ र सोमबारको मामिलामा पनि उही दृष्टिकोण लिइन्छ कि लिइँदैन भन्ने स्पष्ट छैन । एजेन्सी
कम्बोडियाका प्रधानमन्त्री हुन सेनले म्यानमारको भ्रमण गरे र म्यान आङ ह्लाङलाई भेटेपछि म्यानमारी जनता र नागरिक समाजका समूहहरूले चर्को आलोचना गरेपछि यो सजाय सुनाइएको हो।
