जाग्रेब। क्रोएसियाका राष्ट्रपति जोरान मिलानोभिचले बिहीबार उहाँको मुलुकका सैनिकहरू युक्रेनमा तीन वर्षभन्दा लामो युद्ध अन्त्य गर्न लक्षित युरोपेली बलहरूको कुनै तैनाथीमा सहभागी नहुने वाचा गर्नुभएको छ ।
रुससँगको सम्भावित युद्धविरामअघि युक्रेनी सुरक्षा बढाउन फ्रान्सले युरोपेली नेताहरू र युक्रेनका राष्ट्रपति भोलोदिमर जेलेन्स्कीको शिखर सम्मेलनको आयोजना गरिरहेको बेला उहाँको यस्तो टिप्पणी आएको हो ।
क्रोएसियाका प्रधानमन्त्री आन्द्रेज प्लेन्कोभिचले उक्त बैठकमा भाग लिनुभएको थियो । बैठकले तथाकथित ‘इच्छुकहरूको गठबन्धन’ द्वारा सैन्य बलको सम्भावित तैनाथीसहित युरोपले के सुरक्षा ग्यारेन्टीहरू दिन सक्छ भनेर निर्धारण गर्न खोजिरहेको छ ।
एउटा क्रोएसियाली सैनिक कुनै पनि व्यवस्थामा युक्रेन जाने छैन, यो पूर्णतः असम्भव छ”, जनवरीमा निर्विरोध दोस्रो कार्यकालमा निर्वाचित मिलानोभिचले फेसबुकमा भन्नुभयो, “क्रोएसियाली सेना कुनै मिसनमा जाने छैन र यसको एउटा कारण के हो भने यो मिसन क्रोएसियासँग वा बिना कहिल्यै हुनेछैन, किनभने यस मिसनका लागि प्राथमिक सर्तहरू पूरा गरिएको छैन–शान्ति सम्झौता र अर्को पक्षको सहमति, जुन दुर्भाग्यवश रुस हो ।
मिलानोभिच सैन्य सहायता र युक्रेनी सैनिकहरूलाई तालिम दिने क्रोएसियाको योजनाका लागि बारम्बार आलोचक रहनुभएको छ । नाटो र युरोपेली सङ्घ (इयु) को सदस्य भएको हैसियतले क्रोएसियाले रूसको आक्रमणविरुद्ध युक्रेनलाई सहायता गर्न सैन्य हेलिकोप्टर लगायत करोडौँ युरो सहयोग गरेको छ ।
सीमित अधिकार भए पनि राष्ट्रपतिले क्रोएसियाली सशस्त्र सेनाको सर्वोच्च कमान्डर र विदेश नीतिमा आफ्नो राय राख्ने गर्नुहुन्छ । मिलानोभिचका राजनीतिक विरोधीहरूले बारम्बार उहाँलाई ‘रूसपक्षीय’ दृष्टिकोण राख्ने तथा नाटो र इयुमा क्रोएसियाको विश्वसनीयतालाई कमजोर पारेको आरोप लगाएका छन् ।
तर ३८ लाख जनसङ्ख्या भएको यस मुलुकमा सर्वेक्षणअनुसार सबैभन्दा लोकप्रिय राजनेता मिलानोभिचले उहाँको मुख्य काम क्रोएसियाको हितको संरक्षण हो भन्ने बारम्बार तर्क गर्नुभएको छ । रासस/एएफपी
