काठमाडौं। अनलाइन स्क्यामिङ कार्यमा संलग्न गराइएका नेपाली नागरिकहरुलाई नेपाली राजदूतावास बैंककले थाइल्याण्ड सरकारको सहयोगमा म्यानमारको मेवाडीबाट उद्धार गरी टाक इमिग्रेसन अफिस, मेसोट हुँदै थाइल्याण्ड ल्याएको छ।
सोही क्रममा उद्धार गरिएका चार जना नेपाली पुरुषहरुलाई आज नेपाल फर्काइएको छ।
नेपाली राजदूतावास बैंककले नेपाल सरकारको तोकिएको मापदण्डअनुसार श्रम स्वीकृति लिएर मात्र विदेश रोजगारमा जान तथा छिटो र धेरै पैसा कमाउने प्रलोभनमा परी कम्बोडिया, लाओस, म्यानमार, थाइल्याण्ड लगायतका देशहरूमा अवैधानिक रूपमा नजान पुन: आग्रह गरेको छ।
यसका साथै, राजदूतावासले आमसञ्चार माध्यम, नागरिक समाज तथा सरोकारवाला सबैलाई यस सन्देशलाई व्यापक रूपमा प्रचार-प्रसार गरी नेपाली नागरिकलाई सचेत बनाउन अनुरोध गरेको छ।
