काठमाडौं । पूर्वराजा ज्ञानेन्द्र शाहले शनिबार शाहवंशीय राजाहरूका कुलदेवता मानिने गोरखकाली र गोरखनाथ मन्दिरको दर्शन र पूजा आजा गरे । राजतन्त्र अन्त्य भएपछि पूर्वराजा शाह पहिलो पटक गोर्खा पुगेर पूजाआजा मात्र गरेनन् अर्थपूर्ण अभिव्यक्ति दिनसमेत भ्याए ।
पूर्वराजा शाहले एक जना सञ्चारकर्मीसमक्ष भने– ‘कसैले कसैको पनि कुभलो नचिताओस्, भलो चिताओस् भन्ने मेरो कामना छ ।’ उनले भनेका अगाडि भने–‘कोही पनि केही गर्न डराउनु पर्दैन । देशमा शान्ति कायम होस् । देशमा विकास होओस् । सबैलाई सुख र समृद्धि होस् भन्ने कामना गर्दछु ।’
प्रजातन्त्र दिवसको अवसर पारेर गत फागुन ६ गते पूर्वराजा शाहले अब आफूलाई सहयोग गर्न आग्रह गर्दै सन्देश जारी गरेका थिए । पूर्वराजाको सन्देशपछि राजावादीहरु सक्रिय भएका छन् । राजसंस्था पुनस्र्थापनाका लागि पूर्वराजावादीहरु एकजुट भएर सडकमा निस्किन थालेका छन् । पोखराबाट फर्किंदा पूर्वराजाको स्वागतमा काठमाडौंमा देखिएको विशाल भीडपछि उनी थप उत्साहित भएका छन् । राजाको समर्थनमा देशका विभिन्न स्थानमा प्रदर्शन भएका छन् । राजतन्त्र स्थापनाको संकल्पसहित नागरिकहरु सडकमा आउने क्रम जारी छ । यो अवस्थामा पूर्वराजाले आफ्ना गतिविधि बढाउँदै लगेका हुन् ।
जनतामाझ पुग्न कुनै न कुनै बहाना चाहिन्छ । अहिले पूर्वराजा ज्ञानेन्द्रले पनि शाहवंशीय राजाहरुका कुलदेवता मानिने गोरखकाली र गोरखनाथको मन्दिर दर्शनलाई बहाना बनाएर गोरखा पुगेका हुन् । उनको उद्देश्य पूजाआजामा मात्र सीमित देखिएको छैन । जनताको चाहना बुझ्न समेत खोजेको देखिन्छ । उनी गोर्खा पुगेका बेला ठूलो संख्यामा नागरिकको साथ र समर्थन पाएका छन् । जबकी उनी २०६२ सालपछि गोर्खा गएकै थिएनन् । २०६२ सालमा नागरिक अभिनन्दनका क्रममा उनी पुगेका थिए ।
झन्डै दुई दशकपछि गोर्खा पुगेका पूर्वराजा शाहले मन्दिरमा पूजाअर्चनाका लागि झण्डै दुई घण्टा समय बिताए । जबकी विगतमा उनले पूजा सामग्री मात्र पठाउने गरेका थिए । तर यस पटक आफैं गोर्खा पुगेर कुलदेवताको पूजाअर्चना गर्न भ्याए ।
पुख्र्यौली थलोमा आउन पाउँदा आफूलाई खुसी लागेको प्रतिक्रिया शाहले दिएका छन् । कुलदेवताको पुजाआजा सकेर फर्कने क्रममा उनले सञ्चारकर्मीमार्फत सन्देश दिएका हुन् । त्यो सन्देशमा देशमा शान्ति नभएको, कोही पनि केही गर्न डराउनुपर्ने अवस्था नभएको भन्दै अहिले देशको अवस्थाप्रति कटाक्ष गरेका हुन् । उनले आफूलाई सहयोग गर्न फागुन ६ गते गरेको आह्वानलाई बल पुग्ने गरी देशमा शान्ति कायम नभएको बताए । यसको अर्थ उनी अब चुप लागेर बस्ने अवस्थामा छैनन् ।
त्यसो त पूर्वराजा शाह बेलाबेलामा शक्तिपीठको दर्शन र पूजा आजा गर्न गइनै रहेका हुन्छन् । तर यो पटक गोर्खामा पुगेर कुलदेवताको पूजा गर्नुको अर्थ उनी अब आफ्नो रणनीतितर्फ अगाडि बढ्न खोजेको देखिन्छ । राजावादीहरुले सुरु गरेको आन्दोलनलाई बल पुर्याउन र जनतालाई आफ्नो पक्षमा लाग्न उत्साहित बनाउन उनले गोर्खालाई रोजेका हुन् ।
पछिल्लो समय राजतन्त्रप्रति जनलहर बढेको छ । एकातिर राजसंस्था स्थापनाको माग गरेर सडक प्रदर्शन हुने गरेको छ । अर्कोतिर संघीय लोकतान्त्रिक गणतन्त्रात्मक व्यवस्थाको वकालत गर्ने दलहरु आरोप प्रत्यारोपमा छन् । एकले अर्कोलाई सिध्याउने खेलमा लागेका छन् । सरकारमा रहेका दलहरुले विपक्षीलाई खुइल्याउने र विपक्षमा रहेका दलहरु सरकारलाई भ्रष्टाचारी करार गर्न उद्दत छन् । जनतामा निराशा व्याप्त छ । रोजगारीका अवसर सिर्जना छैनन् । संघीयताप्रतिको वितृष्णा बढ्दो छ । सरकारमै रहेका दलहरुका फरक फरक अभिव्यक्ति छन् । एउटै दलभित्र पनि कुनै पनि विषयमा समान धारणा छैन । विकास र समृद्धिको सपना केबल भाषणमा सीमित छ । जनतामा देखिएको निराशाको फाइदा राजतन्त्रवादीहरुले लिने प्रयासमा लागेका छन् ।
पूर्वराजाको सक्रियतापछि गणतन्त्रवादी दलहरुलाई चस्का परेको छ । विशेष गरेर नेपाली कांग्रेस, नेकपा एमाले र नेकपा माओवादी केन्द्रका शीर्ष नेताहरु दिनदिनै जसो पूर्वराजाको आलोचना गरिरहेका छन् । कतिसम्म भने नेकपा एमाले र नेकपा माओवादी केन्द्रले त सडकमै उत्रिने घोषणा गरिसकेका छन् । एमालेले चैत ११ गते देशभर जनजागरण अभियान सञ्चालन गर्दै छ भने नेकपा माओवादी केन्द्र तराई मधेश केन्द्रित हुलाकी राजमार्ग अभियानमा छ । उनीहरुको भय राजसंस्था स्थापना भयो भने आफूहरु फेरि लुकेर बस्नुपर्ने अवस्था आउन सक्नेमा छ ।
शाहवंशीय राजाको पूर्वजको थलो गोर्खा नै हो । गोर्खाका राजा पृथ्वीनारायण शाहले नै नेपाल एकीकरण गराएका हुन् । पृथ्वीनारायणले एकीकरण गर्न निस्कनु अघि आफ्ना कुलदेवताको पूजाआजा गरेको र त्यहिँबाट आशिर्वाद लिएर सफलता हासिल गरेको विश्वास लिइन्छ । त्यही कारण पनि पूर्वराजा ज्ञानेन्द्रले आफ्नो अभियानका लागि गोर्खामा पुगेर पूजाआजा गरेको हुनसक्ने देखिएको छ ।
गोर्खाका तत्कालीन राजा पृथ्वीनारायणले जसरी नेपाल एकीकरण गरेर अनेकौं जातजाती, भाषाभाषीलाई एकताको सूत्रमा बाँधेका थिए । त्यसरी नै पूर्वराजा ज्ञानेन्द्रले पनि गोर्खा पुगेर देशमा केही हुन नसकेको सन्देश दिँदै आफ्नो पक्षमा जनमत पार्न खोजेको स्पष्ट छ ।
