काठमाडौँ । गृहमन्त्री रामबहादुर थापाले कैदीबन्दीमा कोरोना भाइरसको संक्रमण बढेकोमा चिन्ता व्यक्त गरेका छन् । प्रतिनिधिसभाको राज्यव्यवस्था तथा सुशासन समितिको भर्चुअल बैठकमा उनले भनेका छन्- 'नेपालका कैदीबन्दीमा संक्रमण बढ्दै गएको छ, जुन अत्यन्तै चिन्ताजनक भएको छ ।'
कारागारमा कोरोनालाई मध्यनजर गरेर पर्याप्त स्वास्थ्य सुरक्षा अपनाएको पनि उनले बताए । कारागारहरुमा स्यानिटाइजर, मास्क तथा पानीको व्यवस्था गरिएको छ । तर पनि बन्दीहरूलाई ल्याउँदा र लैजादा संक्रमण फैलिँदै गएको छ- उनले भने ।
समितिको सो बैठकमा कारागार व्यवस्थापन विभागका प्रमुख द्रोण पोख्रेलले कुन कारागारमा कति कैदीबन्दीमा कोरोना संक्रमण भएको छ भन्ने जानकारी दिएका थिए ।
सो जानकारीअनुसार केन्द्रीय कारागारका ७ बन्दीमा पछिल्लो समय कोरोना संक्रमण देखिएको छ । सबै गरेर केन्द्रीय कारागारमा १३ जना संक्रमित रहेका छन् । तीमध्ये ३ जनामा लक्षण देखिएको र बाँकीमा संक्रमणको लक्षण नभएको पोखरेलले बताए ।
ुकोरोनाको संक्रमण देखिएका ३ जनालाई बलम्बुस्थित सशस्त्र प्रहरी अस्पताल लैजाने तयारी भइरहेको छ भने बाँकी १० जनालाई कीर्तिपुरको आयुर्वेद अस्पतालमा लगिएको बताइएको छ । कारागारमा संक्रमण फैलिन थालेसँगै कैदीबन्दीसँग बाहिरका मान्छेको भेटघाट बन्द गरिएको र नयाँ कैदीको पीसीआर परीक्षण गरी १० दिन आइसोलेसनमा राखेर मात्रै बन्दी गृहमा पठाइन थालिएको उनले जानकारी दिए ।
केन्द्रीय कारागारमा कोरोना संक्रमण रोकथाम र उपचारका लागि पर्याप्त सुरक्षा सावधानी अपनाइएको पोख्रेलको भनाइ थियो । केन्द्रीय कारागारमा ३ हजार एक सय कैदीबन्दी रहेक छन् । कारागारको अस्पताल र विद्यालयलाई आइसोलेसन र क्वारेन्टाइनका रुपमा पनि परीणत गरिएको छ ।
त्यस्तै मुलुकका विभिन्न कारागारमा पनि कोरोना संक्रमित रहेको पोख्रेलको भनाइ थियो । बाँके जिल्ला कारागारमा ८ जनामा कोरोना संक्रमण देखिएको र उनीहरूलाई निको भएको उनले बताए । स्याङजाका एक कैदीमा कोरोना देखिएकोमा पोखरामा उपचार गराएर निको भइसकेको उनको भनाइ थियो ।
सिरहा कारागारका ७ जना संक्रमितमध्ये ३ जना निको भइसकेका र ४ जनाको उपचार भइरहेको पोख्रेलले बताए । सुनसरीको जेलमा रहेका ८ जना कैदी संक्रमित भएकोमा ४ जना कोरोनामुक्त भएको पनि उनले जानकारी दिए ।
मुलुकभरका कारागारमा १६ हजार कैदीको क्षमता रहेको भए पनि ती कैदमा २४ हजारले कैद भुक्तान गरिरहेका छन् । यसकारण पनि अहिलेको समयमा कोरोना भाइरसको संक्रमण फैलिने डर झनै बढेको हो ।
कैदीबन्दी घटाउने तयारीमा सरकार
यसैबीच सरकारले कैदीबन्दीको संख्या घटाउने तयारी गरिरहेको गृहमन्त्रीले जनाएका छन् । सोही बैठकमा उनले असोज ३ गते संविधान दिवसको अवसरमा कैदीहरूलाई घटाउने गृहकार्य भइरहेको बताए ।
त्यस बैठकमा सांसदहरूले निश्चित समय कैद भुक्तान गरेकालाई मुक्त गर्न सुझाएका थिए । नेकपाका सांसद झपट रावलले ६० प्रतिशत कैद भुक्तान गरेकालाई माफी दिनुपर्ने बताएको प्राप्त समाचारमा छ ।
ुराज्यले चाह्यो भने ५० प्रतिशत कैद भुक्तान गरेका कैदीलाई मुक्त गर्न सकिन्छ । कैद मिनाहा गरेर रिहाइ गर्न सकिन्छ । यदि अहिलेकै रुपमा कोरोना संक्रमण बढ्यो भने सरकारले कैदी बन्दीलाई आगामी असोज ३ गतेको संविधान दिवसको अवसरमा मुक्त गर्न सक्छ ।
