काठमाडौँ । नेपाली काँग्रेसले सरकारले निषेधाज्ञा लगाउने र खोल्नेजस्ता निर्णय हचुवाको भरमा गरेको आरोप लगाएको छ । 'सरकारले हचुवाका भरमा गरेको यही निर्णयका कारण न जनताले कुनै राहात पाएका छन् र नत संक्रमितको संख्या नै उल्लेख्य रुपमा घट्न सकेको छ' प्रमुख प्रतिपक्षी नेपाली कांग्रेसले बताएको छ।
कुनै ठोस अध्ययनविना लकडाउन, निषेधाज्ञा गर्ने वा खोल्ने निर्णय भइरहेको कांग्रेसले गठन गरेको कोरोना अनुगमन समितिले बताएको हो। समितिका संयोजक, कांग्रेस सहमहामन्त्री डा.प्रकाशशरण महतले सरकार कोरोना रोकथाम तथा नियन्त्रणको आवश्यक तयारीप्रति अझै गम्भीर नरहेको बताएका हुन्।
बिहीबार प्रेस विज्ञप्तिमार्फत डा.महतले ‘सरकार कोरोना संक्रमण रोकथाम र उपचारको आवश्यक तयारीप्रति अझै पनि गम्भीर बन्न नसकेको बताएका हुन् । उपत्यकामा फेरि निषेधाज्ञा थपिएको तर यसको कुनै वैज्ञानिक आधार र अनुसन्धान सरकारले नगरेको उनको भनाई छ ।
यस्ता लकडाउन र निषेधाज्ञा गर्ने र हटाउने निर्णय ठोस अध्ययनका आधारमा नभएर हचुवामा हुने गरेको उल्लेख गरेका छन्। साथै सो समितिले कोरोना भाइरस सङ्क्रमणलाई नियन्त्रण गर्न, उपचारको समुचित व्यवस्था गर्न र नागरिकको आर्थिक सामाजिक जीवनमा देखापरेको कष्टलाई कम गर्न तत्काल अल्पकालिन र दीर्घकालिन कार्ययोजना सार्वजनिक गर्न सरकारसँग पुनः माग गरेको छ ।
कांग्रेसको कोभिड–१९ अनुगमन समितिका तर्फबाट प्रकाशित सो विज्ञप्तिमा कोरोना रोकथाम, उपचार व्यवस्थापन र आर्थिक–सामाजिक सङ्कट कम गर्न सो कार्ययोजना सार्वजनिक गर्न माग गरेको हो ।डा.महतले सरकारसँग अझै जनतालाई आश्वस्त पार्ने कुनै तयारी नदेखिएको उल्लेख गर्दै यस्तो संवेदनहिनता र निष्क्रियताको निन्दा गरे ।
अन्य तयारीको अभावमा कोरोना नियन्त्रणमा सरकारको बन्दाबन्दी र निषेधाज्ञाप्रतिको निर्भरता बढ्दो भएको र निषेधाज्ञाको निरन्तरताले आर्थिक–सामाजिक सङ्कट चुलिनुका साथै सङ्क्रमण बढ्नेक्रम पनि कम नभएको विज्ञप्तिमा उल्लेख छ ।
