एजेन्सी । इजरायलका प्रधानमन्त्री बेन्जामिन नेतान्याहुले बुधबार दिउँसो हमासले आफ्ना बन्धकहरूलाई रिहा नगरे युद्धविराम अन्त्य हुने बताएका छन् ।
टाइम्स अफ इजरायलका अनुसार नेतन्याहुले आफ्नो सुरक्षा मन्त्रिपरिषद्सँगको ४ घण्टा लामो बैठकपछि यो वक्तव्य दिएका हुन् ।
यद्यपि नेतान्याहुले सबै बन्धकहरूलाई रिहा गर्ने वा शनिबार रिहा हुने तीन जना बन्धकहरूबारे कुरा गरेका हुन् भन्ने स्पष्ट भइसकेको छैन ।
इजरायली प्रधानमन्त्रीले भने-
हमासले युद्धविराम उल्लङ्घन गर्न र हाम्रा बन्धकहरूलाई रिहा गर्न अस्वीकार गर्दै आएको छ । यसलाई ध्यानमा राख्दै, मैले गाजा वरिपरि सेनाको संख्या बढाउन आईडीएफलाई आदेश दिएको छु । हमासले शनिबारसम्म बन्धकहरूलाई रिहा नगरे युद्धविराम समाप्त हुनेछ । हाम्रो सेनाले फेरि युद्ध सुरु गर्नेछ र हमासलाई नहराएसम्म जारी रहनेछ ।
इजरायलका रक्षा मन्त्रीले सेनालाई सतर्क रहन र गाजामा कुनै पनि अवस्थाको सामना गर्न तयार रहन निर्देशन दिएका छन् । इजरायली सेनाले गाजा डिभिजनका सैनिकहरूको सबै बिदा रद्द गरेको छ, जसले इजरायलले युद्ध पुनः सुरु गर्ने तयारी गरिरहेको संकेत गरेको छ ।
यसअघि हमासले इजरायली सेनाले गाजामा जाने सहायता रोकेर युद्धविराम उल्लंघन गरेको आरोप लगाएको थियो । यस्तो अवस्थामा उनीहरूले अर्को आदेश नआएसम्म बन्धकहरूको रिहाइ रोक्नेछन् ।
