एजेन्सी । भारतको प्रयागराज महाकुम्भमा माला बेचेर चर्चामा आएकी मोनालिसा अब चलचित्रमा काम गर्ने भएकी छन् ।
साधुको त्यो महाकुम्भमा निलो आँखावाली मोनालिसा यति धेरै प्रिय भइन् कि फोटो खिचाउनेको भिडले उनले आफ्नो व्यापार छोडेर घर फर्कनुपर्यो । उनले दामभन्दा धेरै नाम कमाइन् ।
मोनालिसाले अब फिल्म निर्माता सनोज मिश्रको आगामी फिल्म ‘द डायरी अफ मणिपुर’ मा खेल्ने मौका पाएकी छिन् ।
यसमा उनी रिटायर्ड आर्मी अफिसरकी छोरीको भूमिकामा देखिनेछिन् । सुटिङअघि उनलाई मुम्बईमा तीन महिना अभिनयको तालिम दिइनेछ ।
मोनालिसालाई कपालको तेल कम्पनीबाट विज्ञापनको अफर आएको थियो तर फिल्मका कारण उनले त्यसलाई अस्वीकार गरिन् ।
हरेक दिन मोनालिसाको कुनै न कुनै भिडियो भाइरल भइरहन्छ । उनको पहिले पढाइ छाडेको भिडियो आयो, त्यसपछि भाइ पढाएको भिडियो ।
मोनालिसाको जीवनमा परिवर्तन ल्याउने भिडियो त्रिवेणी संगममा माला बेच्दै गरेको अवस्थामा खिचिएको थियो । त्यो भिडिओ सामाजिक सञ्जालमा भाइरल भएपछि मानिसहरूले उनलाई मोनालिसासँग तुलना गर्न थाले ।
इन्दौर निवासी ‘मोनालिसा’ महाकुम्भ क्षेत्रमा पवित्र र शिवको प्रतीक रुद्राक्ष बेच्थिन् । मोनालिसाको आँखाको फरक रङका कारण उनको सुन्दरताको तारिफ भइरहेको छ भने गरिबीमा बिताएको बाल्यकाल र उनको दर्दनाक कथाले मानिसलाई स्तब्ध बनाएको छ ।
यसैबीच महाकुम्भमा बढ्दो अवरोधका कारण र आफ्नो परिवारको सुरक्षाको चिन्ताका कारण मोनालिसाले कुम्भलाई बिदाइ गरी मध्य प्रदेशको महेश्वरस्थित आफ्नो घर फर्कने निर्णय गरेकी छन् ।
