एजेन्सी । अमेरिकाको क्यालिफोर्निया राज्यको लस एन्जलसमा शुक्रबार भएको आगलागीमा परी मृत्यु हुनेको संख्या १० पुगेको छ । यो क्यालिफोर्नियामा अहिलेसम्मकै सबैभन्दा ठूलो आगलागी हो ।
विगत ४ दिनदेखि लागेको आगो करिब ४० हजार एकड क्षेत्रफलमा फैलिएको छ । २९ हजार एकड क्षेत्रफल पूर्णरुपमा जलेको छ ।
आगलागीबाट करिब १० हजार भवन जलेर नष्ट भएका छन् भने ३० हजार घरमा क्षति पुगेको छ ।
झण्डै ५० हजार मानिसलाई तत्काल घर छाड्न भनिएको छ । करिब ३ लाख मानिसलाई सुरक्षित स्थानमा जान निर्देशन दिइएको छ । शनिबारसम्म आगलागी थप फैलिने चेतावनी प्रशासनले दिएको छ ।
आगलागीका कारण लस एन्जलस को ब्रेटनवुड क्षेत्रमा रहेको उपराष्ट्रपति कमला ह्यारिसको घर खाली गर्न पनि निर्देशन दिइएको छ । एलए अमेरिकाको सबैभन्दा धेरै जनसंख्या भएको काउन्टी हो । यहाँ १ करोडभन्दा बढी मानिस बस्छन् ।
क्यालिफोर्नियामा लागेको आगोलाई हेलिकप्टर र विमानबाट नियन्त्रण गर्ने प्रयास भइरहेको छ । तर हावाहुरी र दिशा परिवर्तन भएका कारण आगो विभिन्न ठाउँमा फैलिरहेको छ । आगो निभाउन करिब ७५०० दमकल खटाइएको छ ।
उद्धार टोलीले हजारौं मानिसलाई सुरक्षित स्थानमा पुर्याइरहेको छ । विद्यालय, सामुदायिक केन्द्र र अन्य सुरक्षित स्थानहरूलाई आपतकालीन आश्रयस्थलमा परिणत गरिएको छ । अवस्था यस्तो छ कि धेरै ठाउँमा आगो निभाउने यन्त्रहरू सख्खा भएका छन् । उनीहरुको पानी सकिएको छ ।
बीबीसीका अनुसार क्यालिफोर्नियाको आगलागी जसरी फैलिरहेको छ, त्यसका कारण अमेरिकी फिल्म उद्योगको पहिचान बनेको ‘हलिउड बोर्ड’ हलिउड पहाडको बिचमा जल्ने खतरा छ । लस एन्जलसमा हलिउड नामको ठाउँ छ, अमेरिकी फिल्म उद्योगको नाम त्यसैको नाममा राखिएको छ ।
