काठमाडौं । नेपाल सरकारले देशबासीलाई जहाँ छौँ, त्यहीँ दशैँ मनाउन आग्रह गरेको छ । स्वास्थ्य तथा जनसंख्या मन्त्रालयले यो वर्षको दसैं जो जहाँ छ, त्यही स्थानमा मनाउन अपिल गरेको हो।
मन्त्रालयका प्रवक्ता डा.जागेश्वर गौतमले यसपालिको दसैं अहिले बसिरहेकै स्थानमा मनाउन सरकारले विशेष आग्रह गर्ने बताए । उनले यस पटकको दशैँमा समन्वय गर्ने र त्यही अनुसार सन्देश प्रवाह गर्नुपर्ने जानकारी गराए।
काठमाडौं उपत्यकामा पछिल्लो समय संक्रमणको अवस्था निकै नै खराब भएको भन्दै मन्त्रालयले यस वर्षका दशैँ र तिहारजस्ता चाडबाडमा विशेष सतर्कता अपनाउन आग्रह गरेको हो ।
पहिलेका वर्षहरुमा दसैंमा लाखौं मानिस काठमाडौं उपत्यकाबाट बाहिरिने गर्दथे ।
यसवर्ष पनि त्यस्तै भयो भने संक्रमणको उच्च जोखिम हुने भन्दै सो आग्रह गरिएको मन्त्रालयले जनाएको छ । आइतबार मात्र उपत्यकामा एक हजार ५ सय ९९ जनामा संक्रमण पुष्टि भएको छ। आज देशभर थपिएका संक्रमितमध्ये उपत्यकाका मात्र ७० प्रतिशत छन्। पछिल्ला दिनहरुमा देशभर देखिएका संक्रमणहरुमध्ये धेरै काठमाडौं उपत्यकामा नै देखिने गरेका छन् ।
यसैबीच प्राप्त समाचारअनुसार सरकारले यसवर्ष दशैँ तिहारका समयमा नागरिकलाई काठमाडौंबाट भित्रबाहिर गर्न नदिने र यदि अबका केही दिनमा ठूलो संख्यामा मानिसहरु दशैँका लागि घर फर्किने अवस्था देखियो भने सरकारले निषेधाज्ञाको पनि तयारी गरेको बुझिएको छ ।
यसअघि पनि स्वास्थ्य मन्त्रालयले देशमा सक्रिय संक्रमितको संख्या २५ हजार नाघ्यो भने राजधानी भित्र र बाहिर सवारी ओहोर दोहोर गर्न नपाउने गरी निषेधाज्ञा गर्नुपर्ने प्रस्ताव गरेको थियो ।
