काठमाडौं । राष्ट्रिय प्रजातन्त्र पार्टीका प्रवक्ता मोहन श्रेष्ठले प्रधानमन्त्री केपी शर्मा ओलीले विदेशमा सम्पत्ति राखेको भनेर सामाजिक सञ्जालमार्फत् सार्वजनिक भएको विषयमा छानबिन गरी यथार्थता सार्वजनिक गर्न माग गरेका छन् ।
प्रवक्ता श्रेष्ठले आज सामाजिक सञ्जालमार्फत हावा चलेर हो वा अरु कुनै कारणले हो पात चाहिँ हल्लिएकै छ भनेका छन् ।
उनले लेखेका छन्–
‘रानी ऐश्वर्यलाई लक्षित गरी पम्फादेवी ठकुरानीको नाममा स्विस बैंकमा अथाह सम्पत्ति छ भन्दै राजपरिवारलाई बदनाम गर्ने नेपालको वामपन्थी कित्ताका प्रमुख घटकहरु पटकपटक सरकारमा जाँदै विभिन्न काण्डमा मुछिँदै र विवादित हुँदै आइरहेका छन् । विदेशी बैंकमा अकुत पैसा राखिएको र विभिन्न विदेशी कम्पनीको साझेदार रहेको आरोप तिनमाथि लाग्ने गरेको छ । राजा, रानी वा राजपरिवारका नाममा कुनै सम्पत्ति विदेशमा थिएन, भएको भए ३५/३६ वर्ष यिनै सरकारमा छन्, यिनले खोजी गरिसक्थे ।
यो आरोप अहिले यिनीहरुमाथि लाग्न थालेको छ र आशंका गर्ने प्रशस्तै ठाऊँ छन् ।
हावा चलेर हो वा अरु कुनै कारणले हो पात चककाहि हल्लिएकै छ !
जवाफदेही सरकार, जवाफदेही दल र जवाफदेही नेताले– हो भने यथार्थ बाहिर ल्याईदिनुपर्छ, होइन भने भ्रम निवारण गरिदिनुपर्छ । तर जनतालाई जवाफ चाहिन्छ ।
प्वाल परेको हवाई चप्पलबाट शुरु भएको जीवन करोडौंको गाडीबाट ओर्लेर आलिशान महलमा सुनको थालमा सुनको चम्चाले खाना खाने हैसियतमा आइपुग्दा दालमे कुछ काला त अवश्य है !
