काठमाडौँ । प्रधानमन्त्री केपी ओलीको चीन भ्रमण चार दिनको मात्र हुने भएको छ ।
उहाँ आगामी डिसेम्बर (मंसिर १७ गते) चीन जाने र डिसेम्बर ५ अर्थात (मंसिर २० गते) स्वदेश फर्किने कार्यक्रम तय भएको प्रधानमन्त्री कार्यालय स्रोतले जनाएको छ ।
समाचार स्रोतका अनुसार उहाँका उच्चस्तरीय भ्रमणहरु सबै डिसेम्बर ३ अर्थात् मंसिर १८ गते नै हुनेछन् । सो दिन उहाँले चिनियाँ राष्ट्रपति सि चिनफिङ, चिनियाँ समकक्षी र अरु विशिष्ठ अधिकारीसँग भेट हुने भएको छ ।
त्यसैगरी डिसेम्बर ४ मा चीनको बेइजिङस्थित नेपाली दूताबासमा आयोजित कार्यक्रमलाई सम्बोधन गर्नुहुनेछ भने सोही दिन नेपाल र चिनियाँ उद्योगी व्यवसायीहरुको संयुक्त कार्यक्रम बिजनेस समिटलाई सम्बोधन गर्ने कार्यक्रम रहेको छ । बेइजिङमा गरिने सो बिजनेस समिटको तयारी नेपाल उद्योग वाणिज्य महासंघले गरिरहेको छ ।
त्यसैगरी सोही दिन नै प्रधानमन्त्री ओलीले चीनको एक विश्वविद्यालयमा प्रवचन दिनुहुने कार्यक्रम पनि तय भएको प्रधानमन्त्री उच्च स्रोतले जनाएको छ ।
उहाँ डिसेम्बर ५ अर्थात् मंसिर २० गते स्वदेश फर्कने कार्यक्रम रहेको छ ।
परराष्ट्रमन्त्री डा देउवा २८ तारिखमा बेइजिङ पुग्ने
प्रधानमन्त्रीको भ्रमणको तयारीका लागि परराष्ट्रमन्त्री डा आरजु राणा देउवा यही नोभेम्बर २८ मा नै चीन जान लागेको बताइएको छ । समाचार स्रोतका अनुसार मन्त्री डा देउवा यही नोभेम्बरको २८ तारिखमा त्यहाँ पुग्ने कार्यक्रम रहेको एक उच्च समाचार स्रोतले जानकारी दिएको छ ।
समाचार स्रोतका अनुसार प्रधानमन्त्रीको भ्रमणको तयारीस्वरुप चिनियाँ विदेशमन्त्री वाङ यीसँग द्विपक्षीय वार्ता गर्न परराष्ट्रमन्त्री डा देउवा चीन जान लाग्नुभएको हो ।
उहाँ नोभेम्बर अन्तिम साता आफ्नो औषधिउपचारको फलोअपका लागि जापान गएर त्यतैबाट बेइजिङ पुग्नुहुनेछ । उहाँले चिनियाँ विदेशमन्त्रीसँग द्धिपक्षीय वार्ता गर्नुहुनेछ ।
उहाँ त्यहीँ बसेर प्रधानमन्त्रीलाई बेइजिङमा नै स्वागत गर्ने कि नेपाल फर्किएर पछि प्रधानमन्त्रीसँगै जाने भन्ने विषयमा भने केही बताइएको छैन ।
