एजेन्सी । भारतले पहिलो टी–२० मा दक्षिण अफ्रिकालाई ६१ रनले पराजित गर्यो । डरबनस्थित किंग्समीड स्टेडियममा भारतले सञ्जु सामसनको शतकको मद्दतले २०२ रन बनाएको थियो ।
जवाफमा दक्षिण अफ्रिका १७.५ ओभरमा १४१ रनमै सीमित भयो । सञ्जु सामसन लगातार दुई टी–२० म्याचमा दुई शतक बनाउने विश्वका चौथो र भारतका पहिलो ब्याट्सम्यान बने । यसअघि फिल साल्ट, गुस्ताभ म्याकन र रिले रुसोले यो कीर्तिमान बनाएका थिए ।
सञ्जु टी–२० अन्तर्राष्ट्रियमा भारतबाहिर शतक प्रहार गर्ने पहिलो भारतीय विकेटकिपर ब्याट्सम्यान बने । विजय मांजरेकरले सन् १९५३ मा टेस्टमा यो उपलब्धि हासिल गरेका थिए भने एकदिवसीयमा राहुल द्रविडले सन् १९९९ मा भारतबाहिर शतक बनाएका थिए । त्यतिबेला द्रविडले विकेटकिपिङ पनि गरिरहेका थिए ।
टी–२० मा भारतीय विकेटकीपरका रुपमा सञ्जुले घरेलु र विदेशमा सर्वाधिक रन बनाएका छन् । हैदरावादमा बंगलादेश विरुद्धको उनको १११ रनको इनिङ घरेलु मैदानमा उच्चतम स्कोर हो, जबकि डरबन टी–२० मा उनको १०७ रनको इनिङ विदेशमा भारतीय विकेटकीपर ब्याट्सम्यानको उत्कृष्ट इनिङ हो ।
सञ्जुले एकै इनिङ्समा सबैभन्दा धेरै छक्का प्रहार गर्ने भारतीय ब्याट्सम्यान रोहित शर्माको कीर्तिमानी बराबरी गरेका छन् । उनले १०७ रनको पारीमा १० छक्का प्रहार गरेका थिए ।
सञ्जुले दक्षिण अफ्रिकाविरुद्ध सबैभन्दा छिटो शतक बनाएका थिए । उनले ४७ बलमा शतक पूरा गरे । यसअघि यो कीर्तिमान ५५ बलमा शतक प्रहार गर्ने सूर्यकुमार यादवको नाममा थियो ।
दक्षिण अफ्रिका र भारतबीचको दोस्रो टी–२० खेल आज राति पौने ८ बजे सुरु हुँदैछ ।
