काठमाडौं । काठमाडौंमा जनघनत्व बढ्दो छ । त्यसअनुसार घुमघामका लागि नयाँनयाँ गन्तव्यहरु बनाउने होडबाजी जस्तै छ । तर काठमाडौंको चन्द्रागिरि नगरपालिकामा पर्ने चन्द्रागिरि हिल्स आकर्षक, लोकप्रिय र प्रमुख गन्तव्य बनेको छ ।
धर्मकर्म गर्न, बालबालिकालाई घुमाउनदेखि मनोरन्जन गर्नसम्म यो डाँडा चर्चित बनेको छ । यहाँ अहिले दैनिक हजारौं मानिस पुग्ने गरेका छन् । विदेशी पर्यटकको रोजाइमा पनि चन्द्रागिरि हिल्स परेको छ ।
समुद्र सतहदेखि २५ सय ५१ मिटर अग्लो चन्द्रागिरिको मौसम सधैंजसो चिसो मौसम छ । अग्लो ठाउँमा भालेश्वर महादेवको मन्दिर छ । थानकोट, चित्लाङ र मार्खु आसपासका बासिन्दा परापूर्वकालदेखि नै दै यो मन्दिरमा पूजा गर्न जाने गरेका थिए । अहिले यो मन्दिरलाई प्यागोडा शैलीमा पुनर्निर्माण गरिएको छ । अहिले त झन् देशविदेशमा मानिस यो मन्दिरमा पुगेर पूजा आजा गर्ने गर्दछन् । मन्दिर परिसरबाट काठमाडौं उपत्यका र अन्नपूर्णदेखि सगरमाथासम्मको हिमशृंखला देखिन्छ ।
चन्द्रागिरिबाट काठमाडौं उपत्यका नियालेपछि पृथ्वीनारायण शाह नेपाल एकीकरणमा उत्प्रेरित भएको ऐतिहासिक सन्दर्भ छ । काठमाडौं उपत्यकामा आक्रमण गर्नुअघि उनले भालेश्वर मन्दिरमा पूजापाठ गरेको भनाइ छ ।
झन्डै एक दशकअघिदेखि सञ्चालन गर्न थालिएको केबल कारले त चन्द्रागिरि डाँडोलाई पर्यटकीय गन्तव्यका रूपमा चर्चामा ल्याएको छ ।
अहिले यहाँ दैनिक ५ हजारसम्म मानिसहरु पुग्ने गरेका छन् । बिदाका दिन आन्तरिक तथा वाह्य पर्यटकको भीड हुन्छ ।
भालेश्वर मन्दिर पश्चिमको २,५४७ मिटर उचाइमा भ्यू–टावर निर्माण गरिएको छ । त्यसको दक्षिण–पश्चिममा बाल उद्यान र पश्चिममा सभा हल छन् । यी दुवै स्थानबाट पनि काठमाडौं उपत्यका र हिमशृंखला दृश्यावलोकन गर्न सकिन्छ । बार, रेस्टुरेन्ट, फास्टफुड सेन्टरलगायतका सुविधा भएको चन्द्रागिरि बालबालिकादेखि ज्येष्ठ नागरिकको समेतको मन जित्न सफल भएको छ ।
यो डाँडामा प्याराग्लाइडिङदेखि जीप लाइनसम्मको व्यवस्था छ ।
डाँडाको दक्षिणी थुम्कोमा चन्द्रागिरि हिल्स लि.ले नै पाँचतारे रिसोर्टसमेत बनाएको छ ।
