काठमाडौँ । अभिनेता विराज भट्ट निर्देशित फिल्म ‘१२ गाउँ’ को ट्रेलर सार्वजनिक भएको छ ।
मंगलबार युट्युबमा सार्वजनिक ट्रेलरमा विराज र उनका छोरा समीर भट्टको एक्सन दृश्यले सबैको ध्यान खिचेको छ ।
‘१२ गाउँ’ नामक एक प्राचीन गाउँको अत्याचारी शासकविरुद्धको लडाइँको कथा यसमा समेटिएको छ ।
सार्वजनिक ट्रेलरलाई सन्देश शाहले तयार पारेका हुन् ।
यो फिल्म विराजका छोरा समीरको पहिलो फिल्म हो । मोडल सनिशा भट्टराई र पूर्वमिस नेपाल इन्टरनेसनल न्यान्सी खड्काले पनि यही फिल्मबाट डेब्यु गर्दै छन् ।
विराज, समीर, सनिशा र न्यान्सीसहित सोनु चन्द्रपाल, दीया मास्के, मुरलीधर, नरेन खड्का, स्टन्ट सिल्भा लगायत थुप्रै कलाकारहरूले फिल्ममा अभिनय गरेका छन् ।
साउथका एक्सन कोरियोग्राफर स्टन्ट सिल्भा र नेपाली कोरियोग्राफर शंकर महर्जनले फिल्ममा एक्सन कोरियोग्राफी गरेका छन् ।
विराज भट्ट फिल्म प्रोडक्सनको फिल्मको लेखक सन्तोष सरकार हुन् भने निर्मातामा सरस्वती भट्ट रहेकी छन् ।
फिल्म दसैंको फूलपाती अर्थात असोज २४ गते रिलिज हुँदैछ ।
