काठमाडौंः नेपालको एक दिवसीय क्रिकेटको मान्यता एक वर्षका लागि थप हुने भएको छ ।
नेपाल क्रिकेट संघ (क्यान)को वार्षिक साधारण सभाको क्रममा क्यानका अध्यक्ष चतुर बहादुर चन्दले सन् २०२२ सम्मलाई रहेको एक दिवसीय मान्यता सन् २०२३ सम्म बढाइएको जानकारी दिनु भएको छ ।
कोभिड–१९ को महामारीले सम्पूर्ण खेल जगत् नै ठप्प हुँदा वार्षिक क्यालेण्डर प्रभावित बनेपछि यस्तो निर्णय भएको हो । नेपालले खेल्ने लिग डिभिजन २ का खेलहरुमा समेत असर परेको छ ।
प्रभाबित खेलहरुलाई पूर्णता दिनुका साथै क्रिकेट क्यालेण्डरलाई पुरा गर्न सन् २०२३ को मार्चसम्म अन्तर्राष्ट्रिय क्रिकेट काउन्सिलले नेपाललाई अन्तर्राष्ट्रिय एक दिवसीयको मान्यता दिएको उहाँले प्रष्ट्याउनुभयो ।
साथै साधारण सभाले आर्थिक वर्ष २०७०।७१ देखि २०७५।०७६ सम्मको संघको वार्षिक लेखापरीक्षण प्रतिवेदनलाई पारित गर्नुका साथै आर्थिक वर्ष २०७७।०७८ को कार्यक्रम र बजेट निर्माण गर्दै अघि बढ्न केन्द्रीय कार्यसमितिलाई निर्देशन दिएको छ ।
साधारणसभाले एन्टी करप्सन, एन्टी डोपिङ र इथिक्स पोलिसी निर्माण गर्न कार्ययोजना बनाएको छ ।
पाँच वर्षे रणनीतिक योजना निर्माण गर्न र सो योजना अन्तर्राष्ट्रिय क्रिकेट काउन्सिलमा पेश गर्ने निर्णय गरिएको अध्यक्ष चन्दले बताउनुभयो ।
जिल्ला र प्रादेशिक क्रिकेट संघहरुको सञ्चालन कार्यविधि निर्माण गर्ने, खेलाडीहरुको आचार संहिता र अनुबन्ध नीति तयार पारिएको, संघ, प्रदेश र जिल्ला समिति मातहातका कर्मचारी, पदाधिकारी एवम् सदस्यहरुको आचार संहिता निर्माण गर्ने पनि साधारणसभाले निर्णय गरेको छ ।
त्यसैगरी, क्यानले नेपाल प्रिमियर लिग सञ्चालन गर्न साधारण सभाका प्रतिनिधिहरु एकमत रहेकोले क्रिकेट संघको स्वामित्व रहने गरी नेपाली क्रिकेटको हित अनुकूल रहने गरी केन्द्रीय समितिलाई नेपाल प्रिमियर लिगको सम्झौता प्रकृया अगाडि बढाउने जिम्मेवारी दिएको छ ।
