काठमाडौं । ‘हेर्ने कथा’ नामको कार्यक्रमले पत्ता लगाएका प्रकाश तामाङ आफ्नै गाउँ भोजपुर फर्किएका छन् । लामो समयदेखि घर भुलेर आफ्नो गाउँमा पुग्न नसकेका उनलाई हेर्ने कथा कार्यक्रमले पुर्याइदिएको थियो ।
भोजपुरको षडानन्द नगरपालिका–१० का तामाङ गोरखाको चुमभ्यालीमा पुगेर कयौं वर्षदेखि बसेका थिए । ‘हेर्ने कथा’को ‘हराएका वर्षहरू’ शीर्षकको पछिल्लो सत्य कथाका मुख्य पात्र प्रकाश गोरखाको चुमनुब्री गाउँपालिका–७ छेकम्पारस्थित मालिकको घरबाट बिदा भएर भोजपुरका लागि हिँडेका हुन् ।
उनलाई छेकम्पारबाट स–सम्मान बिदा गरिएको हो । उलाई छेकम्पारमा बिदाइका क्रममा चुमनुब्री वडा नम्बर ८ का अध्यक्ष टसी दोर्जे लामा, स्थानीय साथीभाइ र मालिकलेसमेत खादा लगाइदिएका थिए ।
चुमनुब्री गाउँपालिकाका अध्यक्ष निमा लामाका अनुसार प्रकाशलाई मालिक टासी लामाले १० लाख रुपैयाँ दिने भएका छन् । त्यसैगरी गाउँपालिकाको तर्फबाट प्रकाशलाई एक लाख रुपैयाँ दिने उनले बताए । उक्त रकम प्रकाशले बैंक खाता खोलेपछि मालिक टासी लामाले जम्मा गरिदिने भएका छन् ।
प्रकाश तामाङ प्रधानमन्त्रीलाई भेट्न काठमाडौं आउने तयारीमा छन् । उनलाई प्रधानमन्त्री केपी शर्मा ओलीले सहयोग गर्ने आश्वासन दिएका छन् ।
नागरिकतासमेत बनाउन नपाएका उनले अब एक–दुई दिनभित्रै नागरिकता पाउने छन् । प्रधानमन्त्री ओलीले उनलाई नागरिकता दिने व्यवस्था तत्काल मिलाउन गृहसचिवमार्फत् निर्देशन दिएका थिए ।
