काठमाडौं । सत्तारुढ दल नेपाल कम्युनिष्ट पार्टी (नेकपा) को सचिवालय बैठक सुरू भएको छ। नेकपाको सचिवालय बैठक शनिबार प्रधानमन्त्रीको सरकारी निवास बालुवाटारमा सुरु भएको हो ।
शनिवार बैठक बस्नुअघि नेकपा अध्यक्षद्वय केपि शर्मा ओली र पुष्पकमल दाहालबिच 'वान टु वान' छलफल भएको थियो । अध्यक्षद्वयको छलफल सकिए लगत्तै सुरु भएको सचिवालय बैठकमा प्रधानमन्त्री एवं नेकपा अध्यक्ष ओली पनि सहभागी भएका छन्।
पछिल्लो समय नेकपामा दुई अध्यक्षले एक अर्कामाथि आरोप प्रत्यारोप लगाइरहेका छन्। आरोप प्रत्यारोपसंगै दुई अध्यक्षबीच विवाद चुलिँदा नेकपा विवाद साम्य हुने भन्दा झन् चर्किदै गएको छ।
केही समयअघि अध्यक्ष प्रचण्डले सचिवालय बैठकमा १७ पेज लामो प्रतिवदेन पेश गरेका थिए। उक्त प्रतिवेदनलाई ओली पक्षमा नेताहरूले ‘आरोपपत्र’ भनेका थिए। सोही प्रतिवेदनको जवाफ लागि ओलीले १० दिन मागेका थिए।
त्यसपछि उनले पनि ३८ पेज लामो प्रतिवदेन तयार गरेर सचिवालयमा पेश गरे। उक्त प्रतिवेदनमा ओलीले प्रचण्डले लगाएका सबै आरोप फिर्ता लिनु पर्ने उल्लेख गरेका थिए।
