काठमाडौँ । नेपाली काँग्रेसले बंगलादेशमा भइरहेको आन्दोलनबाट प्रभावित नेपाली विद्यार्थी र नेपाली नागरिक प्रभावित भएको भन्दै आवश्यक प्रवन्ध मिलाउन सरकारसँग आग्रह गरेको छ ।
आईतवार संसद भवनमा बसेको पार्टीको संसदीय दलको बैठकले सो निर्णय गरेको नेपाली काँग्रेसका प्रमुख सचेतक श्यामकुमार घिमिरेले बताउनु भयो । उहाँले संसदीय दलको बैठकले बंगलादेशमा चलिरहेको आन्दोलनबाट त्यहाँ रहेका नेपाली विद्यार्थी र नागरिकलाई स्वदेश फिर्तीको व्यवस्था मिलाउन आग्रह गरेको बताउनु भयो ।
उहाँले अविरल वर्षाका कारण देशका विभिन्न स्थानमा जनधनको ठूलो क्षति भएको भन्दै सरकारलाई त्यसप्रति गम्भीर बन्न आग्रह गरेको बताउनु भयो ।
उहाँले भन्नुभयो, ‘बंगलादेशमा चलिरहेको आन्दोलनमा नेपाली विद्यार्थी र अन्य नेपाली नागरिक समेत प्रभावित भइ स्वदेश फिर्तीमा समेत समस्या भइरहेको समाचार आइरहेको हुँदा उनीहरुको सुरक्षा र उनीहरुलाई स्वदेश फिर्तीको सहज व्यवस्था गर्न सरकारसँग माग गर्दछ । अविरल वर्षाका कारण देशका विभिन्न स्थानमा जनधनको ठूलो क्षति भएको छ । केहीको मृत्यु भएको छ भने केही बेपत्ता भएका छन् । मृतकप्रति श्रद्धाञ्जली र उनीहरुका परिवारमा समवेदना प्रकट गर्दै उचित राहतको व्यवस्था गर्न र बेपत्ताको खोजि कार्य तिब्र बनाउन र घाइतेको उपचार गर्न सरकारसँग आग्रह गर्दछौँ । सिमलटारमा बेपत्ताको खोजि कार्यलाई अझ तिब्र पार्न यो बैठक माग गर्दछ । बाढी, पहिरो र डुबानका कारण समस्यामा रहेका नागरिकलाई सहयोग गर्न नेपाली काँग्रेसका सबै शुभेच्छुक संस्था र भ्रातृ संस्थालाई सहयोग गर्न आग्रह गर्दछौँ ।’
प्रमुख सचेतक घिमिरेले सिमलटारमा बस पहिरोले बगाउँदा बेपत्ताको खोजि कार्यलाई तिब्र बनाउन पनि सरकारको ध्यानाकर्षण गराएको बताउनु भयो । बाढी, पहिरो र डुबानका कारण समस्यामा रहेका नागरिकलाई सहयोग गर्न पार्टीका भ्रातृ संस्थाहरुलाई निर्देशन दिने निर्णय भएको बताउनु भयो ।
बैठकले प्रधानमन्त्री केपी शर्मा ओलीलाई विश्वासको मत दिने र नवगठित सरकारका मन्त्रीहरुलाई सफल कार्यकालको शुभकामना व्यक्त गरेको छ ।
