एजेन्सी । दक्षिण अफ्रिका र अफगानिस्तान २०२४ को टी–२० विश्वकपअघि सेमिफाइनलमा भिड्नेछन् । अफ्रिका कुनै पनि खेल नहारी सेमिफाइनलमा प्रवेश गरेको छ ।

अर्कोतर्फ अफगानिस्तान पहिलो पटक टी–२० विश्वकपको सेमिफाइनलमा पुगेको छ । पहिलो पटक सेमिफाइनल खेलिरहेको अफगानिस्तानका लागि जित सहज हुनेछैन तर अफ्रिकाको कीर्तिमानले उनीहरुको कठिनाइ घटाएको छ ।

विश्वकपको नकआउटमा दक्षिण अफ्रिकाको कीर्तिमान निकै खराब छ । अफ्रिकाले एकदिवसीय र टी–२० विश्वकपमा अहिलेसम्म १० नकआउट खेल खेलेको छ, जसमा उसले १ खेल मात्र जितेको छ । उसको एक मात्र जित सन् २०१५ को एकदिवसीय विश्वकपमा श्रीलंका विरुद्ध क्वार्टरफाइनल खेल्दा आएको थियो । अफ्रिकाको यो खराब रेकर्ड अफगानिस्तानका लागि राम्रो साबित हुन सक्छ ।

अफ्रिकाले १० मध्ये २ पटक टी–२० विश्वकपको नकआउट खेल खेलेको छ, जसमा दुवै पटक सेमिफाइनलमा पराजित भएको छ । अफ्रिका एकपटक पनि टी–२० विश्वकपको फाइनलमा पुग्न सकेको छैन । नकआउटमा खराब रेकर्ड भएका कारण अफ्रिकालाई ‘चोकर्स’ पनि भनिन्छ ।

विश्वकप नकआउटमा दक्षिण अफ्रिकाको प्रदर्शन (ओडीआई र टी–२० विश्वकप सहित)
१९९२ – सिड्नीमा भएको सेमिफाइनलमा इङ्ल्यान्डसँग पराजित

१९९६ – कराँचीमा क्वार्टर फाइनलमा वेस्ट इन्डिजसँग पराजित

१९९९ – बर्मिङ्घममा अस्ट्रेलिया विरुद्धको सेमिफाइनलमा टाई भयो र बाहिरियो

२००७ – सेन्ट लुसियामा सेमिफाइनलमा अस्ट्रेलियासँग पराजित

२०११ – मिरपुरमा क्वार्टर फाइनलमा न्यूजील्याण्डसँग पराजित

२०१५ – सिड्नीमा क्वार्टर फाइनलमा श्रीलंका विरुद्ध जित

२०१५ – अकल्याण्डमा सेमिफाइनलमा न्यूजील्याण्डसँग पराजित

२०२३ – कोलकातामा सेमिफाइनलमा अस्ट्रेलियासँग पराजित

२००९ – नटिङ्घम (टी–२० विश्वकप) मा पाकिस्तान सेमिफाइनलमा पराजित

२०१४ मिरपुर (टी–२० विश्वकप) मा भएको सेमिफाइनलमा भारतसँग पराजित

यो विश्वकपमा अहिलेसम्म दुवै टोलीको प्रदर्शन कस्तो रह्यो ?
अफगानिस्तानः अफगानिस्तानले समूह चरणमा ४ मध्ये ३ खेल जितेको छ । राशिद खानको कप्तानीमा रहेको अफगानिस्तानले समूह चरणका तीन खेल युगान्डा, न्युजिल्यान्ड र पपुवा न्युगिनीविरुद्ध जितेको थियो । समूह चरणमा वेस्ट इन्डिजसँग मात्रै हार बेहोरेको थियो ।

त्यसपछि भारतसँगको खेल हारेर टोलीले सुपर–८ सुरु गरेको थियो । तर यसपछि उसले अष्ट्रेलिया र बंगलादेशविरुद्धको अर्को दुई खेल जित्न सफल भयो ।

दक्षिण अफ्रिकाः दक्षिण अफ्रिका कुनै पनि खेल नहारी सेमिफाइनलमा प्रवेश गरेको छ । टोलीले श्रीलंका, नेदरल्यान्ड्स, बंगलादेश र नेपालविरुद्ध समूह चरणका चारवटै खेल जितेको थियो । यसपछि सुपर–८ मा अफ्रिकी टोलीले अमेरिका, इङ्ल्यान्ड र वेस्ट इन्डिजविरुद्ध तीनवटै खेल जितेको थियो ।