काठमाडौँ । ट्वान्टी–२० विश्वकपमा बंगलादेशले नेदरल्याण्ड्समाथि लगातार तेस्रो जित हात पारेको छ । बिहीबार भएको खेलमा टोलीले डच टोलीलाई २५ रनले पराजित गरेको हो ।
यो जितसँगै बंगलादेशले सुपर–८ मा आफ्नो दाबी बलियो बनाएको छ भने नेदरल्याण्ड्स भने दौडमा छ । यो नतिजासँगै २०१४ को च्याम्पियन श्रीलंका सुपर ८ को दौडबाट बाहिरिएको छ ।
किंग्सटाउनमा नेदरल्याण्ड्सले टस जितेर फिल्डिङ गर्ने निर्णय गरेको थियो । बंगलादेशले २० ओभरमा ५ विकेट गुमाएर १५९ रन बनाएको थियो । जवाफमा नेदरल्यान्ड्सले निर्धारित २० ओभरमा ८ विकेट गुमाएर १३४ रन मात्र बनाउन सक्यो । यस जितको नायक बने रिशाद हुसेन । उनले ४ ओभरमा ३३ रन दिएर ३ विकेट लिए ।
नेदरल्याण्ड्सका लागि सिब्रान्ड एन्जेलब्रेचटले सर्वाधिक ३३ रन बनाए । विक्रमजीत सिंहले २६ रन र कप्तान स्कट एडवर्ड्सले २५ रन बनाए ।
बंगलादेशका लागि शकिब अल हसनले अविजित ६४ रनको अर्धशतकीय पारी खेले । उनले ३८ बलमा अर्धशतक बनाए । शकिबले टी–२० अन्तर्राष्ट्रियमा १९ इनिङ्सपछि अर्धशतक बनाएका छन् । यस्तै, तान्जिद हसनले ३५ र महमुदुल्लाहले २५ रन बनाए । नेदरल्यान्ड्सका आर्यन दत्त र पल भान मिकरेनले २–२ विकेट लिए ।
यस समूह डी बाट दक्षिण अफ्रिका सुपर ८ मा प्रवेश गरिसकेको छ । उसको ३ खेलमा ३ जितसहित ६ अंक छ । बंगलादेश ३ खेलबाट ४ अंकका साथ दोस्रो, नेदरल्यान्ड्स ३ खेलबाट २ अंकका साथ तेस्रो, नेपाल २ खेलबाट १ अंकका साथ चौंथो र श्रीलंका ३ खेलबाट १ अंकका साथ पाँचौं स्थानमा छन् ।
