एजेन्सी । टी–२० विश्वकप २०२४ अन्तर्गत आज भारत र अमेरिकाबीच रोमाञ्चक खेल हुँदैछ । यो खेलमा दुई टोलीबीच कडा प्रतिस्पर्धा हुनेछ ।
दुवै टोलीले यसअघिका खेल जितेका छन् र बुधबार हुने खेलमा दुवै टोली सुपर–८ मा प्रवेशका लागि दबाब दिँदैछन् ।
भारतीय टोलीले आज ‘मिनी इन्डिया’को सामना गर्नेछ । वास्तवमा, अमेरिकी टोलीमा आठ भारतीय र दुई पाकिस्तानी मूलका खेलाडी छन् । यसैबीच पाकिस्तानी मूलका दुई खेलाडीको चर्चा गरौं जसले भारतीय टोलीलाई समस्यामा पार्न सक्छ ।
अली खान
पाकिस्तानमा जन्मेका अली खान सन् २०१० मा आफ्नो सम्पूर्ण परिवारसँग अमेरिका गएका थिए । उनको क्रिकेट करियर क्लब क्रिकेटबाट सुरु भएको थियो । उनी २०१६ मा अमेरिकी टोलीमा छनोट भएका थिए, त्यसबेलादेखि उनी यही टोलीको हिस्सा हुन् ।
अली खान आफ्नो घातक बलिङका लागि चर्चित छन् । उनले अमेरिकाका लागि १० टी–२० अन्तर्राष्ट्रिय खेलमा ११ विकेट लिएका छन् । यस अवधिमा उनको इकोनोमी रेट ७.९५ छ । मिडिया रिपोर्टका अनुसार अलीको करियरमा ब्राभोको महत्वपूर्ण भूमिका थियो । ब्राभोले उनको प्रतिभालाई चिन्दै क्यारेबियन प्रिमियर लिगमा खेल्ने मौका दिएका थिए । अब अली भारतविरुद्ध खेल्न तयार छन् । रोहित शर्मा र विराट कोहलीजस्ता ब्याट्सम्यानविरुद्ध उनले कस्तो प्रदर्शन गर्छन् भन्ने कुरा चासोको विषय हुनेछ ।
शायन जहांगीर
अमेरिकी टोलीमा पाकिस्तानी मूलका दोस्रो क्रिकेटर शायन जहांगीर हुन् । सन् १९९४ मा जन्मेका शायन ब्याटिङका साथै विकेटकिपिङमा पनि माहिर छन् । उनले १२ अक्टोबर २०१४ मा २०१४र१५ काइद–ए–आजम ट्रफीमा पाकिस्तान इन्टरनेशनल एयरलाइन्सको लागि आफ्नो प्रथम श्रेणी डेब्यू गरे । जुलाई २०२० मा, उनलाई क्यारिबियन प्रिमियर लिग (सीपीएल) को लागि बार्बाडोस ट्राइडेन्ट्स टोलीको एक हिस्सा बनाइएको थियो ।
जहांगीरले सन् २०१३ मा पाकिस्तान अन्डर १९ क्रिकेट टोलीबाट सात ओडीआई खेलेका थिए । जनवरी २०२१ मा, युएस क्रिकेटले जहांगीरलाई आफ्नो ४४ सदस्यीय टोलीमा २०२१ ओमान त्रि–राष्ट्रीय शृङ्खला अघि टेक्सासमा प्रशिक्षण सुरु गर्न समावेश गरेको थियो । नोभेम्बर २०२२ मा, जहांगीरले नामिबिया विरुद्ध संयुक्त राज्य अमेरिकाको लागि आफ्नो ओडीआई डेब्यू गरे ।
उनले अहिलेसम्म अमेरिकाबाट एउटा मात्र टी–२० खेल्ने मौका पाएका छन् । जसमा उनले १८ रन बनाएका छन् । अमेरिकाका कप्तान मोनांक पटेलले भारतविरुद्ध जहांगीरलाई मौका दिन सक्ने अनुमान गरिएको छ ।
