एजेन्सी । २०२४ को टी–२० विश्वकपमा, सबै क्रिकेट फ्यानहरू आजको प्रतिक्षामा छन्, जब भारत र पाकिस्तानका टोलीहरू आमनेसामने हुनेछन् र उच्च भोल्टेज खेल हुनेछ ।
दुई टोलीहरूबीचको टी विश्वकपको पहिलो खेल २००७ मा खेलिएको थियो । खेल टाईमा सकिएपछि भारतले बलआउटमा जित्दै २ अंक जोडेको थियो ।
यसपछि सोही विश्वकपको फाइनलमा भारत–पाकिस्तानको टोली फेरि भिड्यो तर भारतले उक्त खेल जितेर ट्रफी जित्यो । यससँगै सन् २०२२ मा भएको टी–२० विश्वकपको खेलमा भारतीय टोलीले पाकिस्तानलाई अन्तिम बलमा पराजित गरेको थियो ।
उक्त खेलमा विराट कोहलीको इनिङ्स उत्कृष्ट थियो । कोहलीले अविजित ८२ रन बनाएर असम्भव जित सम्भव बनाएका थिए । यसपटक पनि किंग कोहलीबाट पाकिस्तानविरुद्ध ठूलो इनिङ्स खेल्ने अपेक्षा गरिएको छ । यस्तो अवस्थामा भारत–पाकिस्तानको खेलमा सबैको नजर कुन–कुन ५ स्टारमा रहने छ भन्नेबारे यहाँ चर्चा गरौँ ।
१. विराट कोहली
पहिलो नम्बरमा विराट कोहलीको नाम आउँछ, जसले आईपीएल २०२४ मा ब्याटिङबाट उत्कृष्ट प्रदर्शन गरेका थिए । आईपीएलमा ओरेन्ज क्याप (सर्वाधिक रन बनाउनेलाई दिइने) कोहलीको टाउकोमा सजिएको थियो । कोहली अहिले उत्कृष्ट लयमा छन् तर आयरल्याण्डविरुद्ध ओपनिङ गर्दा उनको ब्याट मौन रह्यो । अब पाकिस्तानविरुद्धको खेलमा कोहलीबाट ठूलो इनिङको अपेक्षा गरिएको छ । गत टी–२० विश्वकपमा कोहलीले पाकिस्तानविरुद्धको खेलमा भारतलाई हारिसकेको खेललाई जिताएका थिए ।
२.बाबर आजम
दोस्रो स्थानमा पाकिस्तानी टोलीका कप्तान बाबर आजमको नाम छ, जसमाथि भारत–पाकबीचको खेलमा सबैको नजर रहनेछ । बाबर आजमले अमेरिकाविरुद्ध पाकिस्तानको सुरुवाती खेलमा ४४ रनको इनिङ खेलेका थिए । त्यसैगरी, २०२१ को विश्वकपमा बाबरले भारतविरुद्ध खेल जित्ने इनिङ खेलेका थिए । यस्तो अवस्थामा यसपटक पनि पाकिस्तानी टोलीले उनीसँग ठूलो इनिङ्स खेल्ने अपेक्षा गरेको छ ।
३. रोहित शर्मा
तेस्रो नम्बरमा रोहित शर्माको नाम छ, जसले आईपीएल २०२४ मा अपेक्षित प्रदर्शन गर्न सकेनन्, तर उनले चेन्नई र राजस्थान रोयल्सविरुद्ध उत्कृष्ट प्रदर्शन गरे । टी–२० विश्वकपमा भारतको उद्घाटन खेलमा रोहित शर्माको ब्याट बलियो गर्ज्यो । उनले ३७ बलमा ४ चौका र ३ छक्का प्रहार गर्दै ५२ रनको इनिङ खेले । अब रोहितले पाकिस्तानविरुद्ध पनि आफ्नो फर्मलाई निरन्तरता दिने अपेक्षा गरिएको छ ।
४. शाहिन अफ्रिदी
चौथो नम्बरमा पाकिस्तानका डरलाग्दो फास्ट बलर शाहिन अफ्रिदीको नाम छ, जो नयाँ बलले भारतविरुद्ध धेरै पटक भारतको इनिङ्सलाई ध्वस्त पारेका छन् । रोहित शर्मा पनि शाहिन अफ्रिदीको अगाडि रन बनाउन संघर्ष गरिरहेको देखिन्छ । यस्तो अवस्थामा भारत–पाकिस्तानको खेलमा सबैको नजर शाहिन अफ्रिदीमाथि लागेको छ ।
५. मोहम्मद अमिर
चौथो नम्बरमा अन्तर्राष्ट्रिय क्रिकेटबाट सन्यास लिइसकेका मोहम्मद आमिरको नाम छ, जसलाई लिएर भारतीय टोलीले सावधानी अपनाउन जरुरी छ । आमिरले आफ्नो स्विङ बलिङले सबैलाई समस्यामा पार्न सक्छन् । २०१७ च्याम्पियन्स ट्रफीमा पाकिस्तानी टोलीको जितमा मोहम्मद आमिरको ठूलो भूमिका थियो । यस्तो अवस्थामा सबैको नजर उनको सन्यासबाट फर्किएपछिको प्रदर्शनमा हुनेछ ।
