काठमाडौँ । ३५.३ ओभरमा १५७ रन बन्यो र १४ विकेट खसेको थियो । यो टेस्ट म्याचको एक सत्र जस्तो देखिन्छ, तर यो कुनै टेस्ट म्याच नभई टी–२० विश्वकपको चौथो खेल थियो । न्युयोर्कको नासाउमा सोमबार श्रीलंका र दक्षिण अफ्रिकाबीच काउन्टी स्टेडियममा खेल भएको थियो ।
यस खेलको रन रेट ४.४२ थियो, जुन टी–२० विश्वकपमा सबैभन्दा कम हो । यति मात्र होइन, यो टी–२० अन्तर्राष्ट्रियमा दोस्रो सबैभन्दा कम रन रेट हो । खेलमा ६ चौका र ६ छक्का सहित १२ बाउन्ड्री मात्र प्रहार भएका थिए ।
नासाउको ड्रप–इन पिच बलरहरूका लागि धेरै फाइदाजनक र ब्याट्सम्यानहरूका लागि कठिन थियो । दुवै टोलीका कुनै पनि ब्याट्सम्यानले २० रनभन्दा बढी रन बनाउन नसक्दा यहाँ ब्याटिङको कठिनाइको अनुमान लगाउन सकिन्छ ।
खेलमा दक्षिण अफ्रिकाका ओपनर क्विन्टन डी ककले सर्वाधिक २० रन बनाएका थिए । त्यस्तै एनरिक नोर्ट्याले ४ ओभरमा ७ रन दिएर ४ विकेट लिए ।
यस खेलमा कप्तान वानिन्दु हसरंगाले टस जितेर ब्याटिङ गर्ने निर्णय गरेपछि कठिन पिचमा १९.१ ओभरमा ७७ रनमा अलआउट भएको थियो । दक्षिण अफ्रिकाले ७८ रनको लक्ष्य पछ्याउन १६.२ ओभर लिएको थियो । त्यति मात्र होइन, टोलीले ४ विकेट गुमाएको थियो ।
