काठमाडौं । कोलकाता नाइट राइडर्सले सनराइज हैदरवादलाई आठ विकेटले पराजित गर्दै इन्डियन प्रिमियर लिग आईपीएलको उपाधि जितेको छ ।
एकपक्षीय फाइनलमा कोलकाता सजिलै विजयी भएको हो । यो कोलकाताको आईपीएलमा तेस्रो उपाधि हो । यसअघि कोलकाताले सन् २०१२ र २०१४ मा पनि उपाधि जितेको थियो ।
उप–विजेतामै सीमित हैदरावाद कोलकातासँग लगातार दोस्रो खेलमा पराजित भएको हो । जितका लागि १ सय १४ रनको लक्ष्य पाएको कोलकाताले १० दशमलव ३ ओभरमा दुई विकेट गुमाएर लक्ष्य पूरा गर्यो ।
विजयी टिमका लागि वेंकटेश अयरले अर्धशतक प्रहार गरे । उसका लागि ओपनर रहमनुल्लाह गुरबाजले ३९ र वेंकटेश अयरले ५२ रन बनाए । उनीहरूले दोस्रो विकेका लागि निर्णायक ९१ रनको साझेदारी पनि गरे । अयरले २६ बलको इनिङ्समा चार चौका र तीन छक्का प्रहार गरे र नटआउट पनि रहे ।
टस जितेर पहिले ब्याटिङ गरेको हैदरावादले १८ दशमलव ३ ओभर मात्रै टिक्यो र यसक्रममा अलआउट हुँदै १ सय १२ रन मात्रै बनाउन सक्यो । त्यसमा नवौं क्रममा आएका कप्तान प्याट कमिन्सले बनाएको २४ रन नै सर्वाधिक ठूलो व्यक्तिगत स्कोर रह्यो । त्यसलाई छाडेर कसैले पनि गतिलो योगदान दिन सकेनन् ।
कोलकाताका लागि सबै बलर कसिकसाउ बलिङ गरे । आन्द्रे रसेलले तीन विकेट लिए भने मिचेल स्टार्क र हरसित रानाले दुईदुई विकेट लिए । लिग चरणको समाप्तीमा कोलकाता नै शीर्ष स्थानमा रहेको थियो र उसले पहिलो क्वालिफायरमा दोस्रो स्थानमा रहेको हैदरावादलाई हराएको थियो ।
