काठमाण्डौ । नीजि क्षेत्रबाट सञ्चालित व्यवसायीक पत्रकारिता प्रशिक्षण संस्था ‘मिडिया प्वाइन्ट’ले वरिष्ठ आर्थिक पत्रकार गजेन्द्र बुढाथोकीलाई ‘मिडिया प्वाइन्ट सम्मान—२०८१’ प्रदान गरेको छ ।
मिडिया प्वाइन्टको २८ औं वार्षिकोत्सवका अवसरमा टक्सार मासिक पत्रिकाका प्रधान सम्पादक रहेका बुढाथोकीलाई १५ हजार ५५५ रुपैयाँ राशीसहित सो सम्मान प्रदान गरिएको हो ।
मिडिया प्वाइन्टका संस्थापक एवम् राष्ट्रिय समाचार समितिका पुर्व महाप्रवन्धक एवम् अर्का संस्थापक अर्जुन बिष्ट वरिष्ठ पत्रकार बुढाथोकीको निवास कपनमै पुगेर आइतबार सो सम्मान प्रदान गर्नुभयो ।
मिडिया प्वाइन्टको पहिलो समूहका प्रशिक्षार्थी एवम् वरिष्ठ पत्रकार बलराम प्यासीको संयोजनमा भएको सम्मान प्रदान कार्यक्रममा पहिलो समूहका पत्रकारहरु इशुजङ्ग कार्की, किशोर बस्नेत, शिवभक्त सैंजु पनि सहभागी थिए ।
राष्ट्रिय पत्रकारिता पुरस्कार लगायत स्वदेशी तथा विदेशी विभिन्न पत्रकारिता पुरस्कारबाट पुरस्कृत भईसकेका वरिष्ठ पत्रकार बुढाथोकीले नेपाल समाचारपत्र दैनिक, राजधानी दैनिक लगायतका पत्रिकाहरुमा झण्डै तीन दशक पत्रकारिता गरिसकेका छन् ।
२०६५ साल असोज १० गते मोटरसाइकल दुर्घटनामा घाइते भएदेखि उनी ह्विलचियरमै बसेर अहिलेपनि सकृय पत्रकारिता गर्दै आएका छन् । २०५३ जेठ गतेदेखि पत्रकारिता कक्षा शुरुवात गरेको मिडिया प्वाइन्टले सो दिनलाई वार्षिकोत्सवको रुपमा मनाउँदै आएको छ ।
यसअघि लगातार पाँच वर्षसम्म कृयाशिल पत्रकारलाई ५ हजार ५५५ रुपैयाँ राशीको मिडिया प्वाइन्ट पत्रकारिता पुरस्कार दिने गरिएता पनि विगत केही वर्षको अन्तरालपछि पहिलो पटक वरिष्ठ पत्रकार बुढाथोकीलाई १५ हजार ५५५ रुपैयाँ राशीसहित सम्मान गरिएको हो ।
