काठमाडौँ । उपप्रधान एवं गृहमन्त्री रवि लामिछानेसँग निलहिरा समाजका प्रतिनिधिले छलफल गरेका छन् ।
लैंगिक अल्पङ्ख्यकले नागरिकता पाउनका लागि झेल्नुपरेको समस्याबारे उनीहरुले गृहमन्त्रीको ध्यानाकर्षण गराउँदै स्वअनुभूतिका आधारमा नागरिकता पाउने व्यवस्था गर्न माग गरेका छन् ।
साथै, सुरक्षा निकाय (प्रहरी र सशस्त्र प्रहरी)मा लैंगिक तथा यौनिक अल्पङ्ख्यकले पनि सहभागिता जनाउन पाउने व्यवस्था गरिदिन आग्रह गरेका छन् ।
सो अवसरमा गृहमन्त्री लामिछानेले भने – ‘यो समाजमा मेरो जति अधिकार छ तपाईंहरुको पनि त्यति नै छ । हरेक व्यक्तिले आफ्नो अधिकार निर्वाध प्रयोग गर्न पाउनु पर्छ भन्नेमा सचेत छु । सरकार पनि सचेत छ। जुन समाजमा लैंगिक अल्पसङ्ख्यकको सम्मान हुँदैन त्यो समाज बस्नयोग्य हुँदैन ।’
उनले अगाडि भने – हामी नागरिकता कार्याविधिमा छलफल गर्ने तयारीमा छौं । उक्त छलफलमा तपाईंहरुलाई पनि निमन्त्रणा गर्छौं । तपाईंहरुका समस्या तपाईंहरुकै प्रतिनिधिबाट सुनेर सरकारले आगामी योजना बनाउनेछ ।’
