काठमाडौँ । नेपाली काँग्रेसका सांसद शंकर भण्डारीले नेपाली काँग्रेस सनातन हिन्दु राष्ट्रको पक्षमा नआए पार्टीलाई क्षति हुने बताउनुभएको छ ।
शुक्रवार प्रतिनिधि सभा बैठक पछि सञ्चारकर्मीहरुसँग कुराकानी गर्दै सांसद भण्डारीले नेपाली काँग्रेस सनातन हिन्दु राष्ट्रको पक्षमा आउनुपर्ने बताउनुभएको हो ।
उहाँले देशलाई सनातन हिन्दु राष्ट्रको रुपमा आत्मसात् नगर्नु दुर्भाग्य भएको भन्दै कांग्रेसले विगतको गल्तीलाई सच्याउनुपर्ने बताउनु भयो । उहाँले बहुमत महासमिति सदस्यहरुले सनातन हिन्दु राष्ट्रको पक्षमा समर्थन गरेको भएपनि पार्टी नेतृत्वले सो कुरालाई आत्मसात् नगरेको बताउनु भयो । उहाँले पार्टीले बहुमत महासमिति सदस्यको कुरालाई स्वीकार नगरेमा पार्टीलाई क्षति पुग्ने बताउनु भयो ।
उहाँले भन्नुभयो – ‘सनातनीरुको मुल मन्दिरको रुपमा रहेको देश यसलाई आत्मसात नगर्नु दुर्भाग्य हो । त्यसकारण काँग्रेस जस्तो राष्ट्रियताको विचार बोकेको पार्टीले यो विषयलाई हिजो गल्ती गर्यौँ अब सच्याएर आत्मसात गर्दै लोकतन्त्रवादी पार्टी, राष्ट्रवादी पार्टीले यो विषयलाई आत्मसात् गरौँ । यो विषयलाई लिएर जनताको जाऔँ भन्ने हाम्रो कुरा हो । काँग्रेसको विधानमा भएको व्यवस्था अनुसार हाम्रो पार्टीको आन्तरिक संरचनामा केन्द्रिय कार्यसमिति भन्दापनि माथि महासमिति हुन्छ । केन्द्रिय कार्यसमितिको निर्णयभन्दा माथि महासमितिका निर्णय हुन्छन् । यो पार्टीको वैधानिक व्यवस्था हो । तेत्रो ठूलो उच्च निकायको बैठकमा उपस्थित संख्या भन्दा धेरै ठूलो प्रतिशतमा महासमितिका नेता साथीहरुले लिखित रुपमा पूर्ण प्रतिवद्धतासहित यो विषयलाई समर्थन गर्नुभएको अवस्था छ । हाम्रो पार्टी लोकतन्त्रवादी पार्टी हो । लोकतन्त्र भनेको जनमतको कदर गर्नु हो । सम्मान गर्नु हो । अर्थात बहुमतको पालना गर्नु हो । लिखित रुपमा महासमितिका बहुमत सदस्यले हस्ताक्षर गरिसकेपछि हाम्रो नेतृत्वले अझैपनि यो कुरालाई आत्मासात् गरेर खुला रुपमा आत्मसात गरिरहेको त्यो कुरालाई स्वीकारीरहेको अवस्था छैन । तर यसले पार्टीलाई क्षति पुग्छ ।’
उहाँले संसारका अति समृद्ध मुलुक र अति विपन्न मुलुकहरुले देशको स्वधर्मलाई अवलम्वन गरेका भन्दै नेपाल पनि सनातन हिन्दु राष्ट्र हुनुपर्ने बताउनु भयो । राजनीतिक स्वार्थका कारण सो मुद्दालाई ओझेलमा पार्नु नहुने उहाँले बताउनु भयो ।
