काठमाडौ । नेपाल कम्युनिष्ट पार्टी नेपाल –दाहाल समुहका नेता रघुजी पन्तले शनिबार राजधानीमा आयोजित एक कार्यक्रममा राष्ट्रिय सभा सांसद कोमल वलीलाई पिंडुला देखाएको भरमा सासद भएको भन्दै कटाक्ष गर्नुभयो ।
पार्टी भित्र संर्घष गरेकाहरुले अबसर नपाएको दाबी गर्दे पन्तले भन्नुभयो ‘‘छन्, महिलाहरु छन्, अहिले केपीतिर पनि लागेका छन् । बीसौं वर्ष बिहे नै नगरेर यो पार्टीमा लागेका महिलाहरु छन् । तर, तिनले टिकट पनि पाएनन् । राष्ट्रिय सभा पनि पाएनन् । केपी ओलीले यसो‘ केरे‘ कोमल वलीले यसो सारी सरक्क सर्काएर गोडा, पिंडुला देखाइदिएपछि संसद त तिनै भइन् ।’
पन्तको अभिव्यक्ति पछि उहाँका कार्यकर्ताले ताली पनि पड्काए । पन्तको अभिव्यक्ति सञ्चारमाध्याम र सामाजिक सञ्जालबाट सार्वजनिक भए लगत्तै राष्ट्रिय सभा सदस्य वलीले ट्वीटर मार्फत पन्त प्रति आक्रोश व्यक्त गर्नुभएको छ । उहाँले नेता पन्तलाई नीच र दरिद्र सोचको व्यक्ति भएको टिप्पणी गर्नुभएको छ ।
वलीले लेख्नु भएको छ – ‘हामीले नेता मानेका रघुजी पन्त कति नीच हुनुहुँदोरहेछ भन्ने बल्ल खुलेको छ । पन्तजीलाई मेरो प्रश्न, तपाईको पार्टीमा कुनै पदमा रहनुभएका महिला नेतृहरुले को कसलाई पिंडुला देखाएर त्यो स्थानमा पुग्नुभएको हो ? के यो देशमा महिला कुनै पदमा पुग्न तपाईंको जस्तो दरिद्र सोचको शिकार हुनुपर्छ ?’
यता सामाजिक सञ्जाल फेसबुकमा वलीले अर्को स्टाटसमा नेकपा नेपाल –दाहाल समूहका अध्यक्ष माधवकुमार नेपाललाई समेत ट्याग गर्दै लेख्नु भएको छ – पूर्वीयदर्शन देखि मानव विकासमा महिलाको उच्च सम्मान समाजको कसिमा उत्तीर्ण भएर भएको छ । प्रकृतिले नै महिला र पुरुषको समायोजन गरेको हो । एकअर्काको आदर सम्मान विना समाजमा न्याय समानता र विवेकशीलताको अन्त हुन्छ । समाज हिंसा तिर जान्छ र दया करुणा जस्ता कुरा हराउँछन् । तसर्थ एकले अर्कालाइ सम्मान गर्नु जीवनलाई मर्यादित र सरल बनाउनु हो । तर नेकपाका नेता रघु पन्तले महिलाहरुले प्राप्त गर्ने पदहरु पिंडुला देखाएर भन्ने जुन अभिव्यक्ति दिनुभएको छ वहाँको मानव बिकासका क्रममा बन्ने तन्तु हरु बीचैमा रोकिएको जस्तो छ । वहाँले प्रयोग गर्ने शब्दहरुले आफ्नो आमा दिदीबहिनी सबैलाई अपमान गरेको छ । विवेकहीन मानिसको आलोचनाले आफैंलाई आलोचित गर्दछ, यस्ता व्यक्तिले नेतृत्व गरेका राजनीतिक पार्टी र समाजको दुर्घटना कति टाढा होला ?"
वलीको यो स्टाटस माथि प्रतिक्रिया जनाउनेहरुले लाज, घीन, शर्म आदि केही नभएपछि जे जे बोल्दा पनि हुँदो रहेछ– कहिले महिलाको अङ्ग, कहिले तिनको वस्त्र भन्दै नेता पन्तमाथि आक्रोश व्यक्त गरेका छन् ।
केही समय अघि प्रतिनिधिसभा बिघटन बिरुद्ध नेपाल–दाहाल समूहले गोरखामा गरेको बिरोध कार्यक्रममा सोही समूहकी नेतृ रामकुमारी झाँक्रीले प्रतिकात्मक रुपमा राष्ट्रपति विद्यादेवी भण्डारीलाई बालकोट जान सुझाब दिएपछि त्यसको चौतर्फी आलोचना भएको थियो ।
