काठमाडौ ।शुक्रराज ट्रपिकल तथा सरुवा रोग नियन्त्रण अस्पतालका सरुवा रोग विशेषज्ञ डाक्टर अनुप बास्तोलाले खोप अभियान आम सर्वसाधारणमा नपुगेसम्म र खोपले पूर्ण काम नगरेसम्म मापदण्ड पालना गर्न आग्रह गर्नुभएको छ ।
डाक्टर बास्तोलाले कोरोना नियन्त्रणमा विश्व समुदाय खोप सँगसँगै अझै कसो गर्ने र के गर्ने भन्ने अवस्थामै रहेको उल्लेख गर्दे हामीसँग कोरोना कहिलेसम्म बस्ने हो ठेगान नभएका कारण बाहिर–फेर निस्कँदा सुरक्षाका मापदण्ड नत्याग्न पनि अनुरोध गर्नुभएको छ ।
बास्तोलाले लेख्नु भएको छ–बाहिर हिँड्दा, देख्दा लाग्छ कि, कोरोना अब छैन । खोप आइसक्यो वा कोरोना अब सक्कियो भनेर हो कि आम सर्बसाधारण मापदण्ड पालना नगरी ढुक्क देखिन्छन । तर, टेकू अस्पतालमा कोरोना भाइरस संक्रमित बिरामीको उपस्थितिले यसो भन्न मिल्दैन ।
महामारीको मध्यमा जस्तो बिरामीको चाप नभए पनि टेकूमा कोभिडका बिरामी आइरहेकै छन्, त्यो पनि आईसीयूमै । यसले देखाउँछ, कोभिडबाट सिकिस्त बिरामी अझै हुनुहुन्छ । अर्थात, बिरामी थपिने क्रम घटेको छ, तर रोकिएको छैन ।
अन्य अस्पतालले कोभिडका बिरामी राख्न बन्द गरेर टेकूमा चाप कायमै रहेको पनि हुन सक्छ । तर पनि अवस्था त्यति ढुक्क हुने किसिमको छैन । त्यसैले खोप अभियान आम सर्वसाधारणमा नपुगेसम्म र खोपले पूर्ण काम नगरेसम्म मापदण्ड पालना गरौं ।
कोरोना नियन्त्रणमा विश्व समुदाय खोप सँगसँगै अझै कसो गर्ने र के गर्ने भन्ने अवस्थामै छ । हामीसँग कोरोना कहिलेसम्म बस्ने हो ठेगान छैन । त्यसैले बाहिर(फेर निस्कँदा सुरक्षाका मापदण्ड नत्यागौं ।
