काठमाडौँ । आइसिसी यु–१९ विश्वकप क्रिकेट प्रतियोगिताअन्तर्गत अफगानिस्तानविरुद्धको खेलमा नेपालले १४६ रनको विजयी लक्ष्य पाएको छ । दक्षिण अफ्रिकाको इष्ट लन्डनस्थित बफेलो पार्कमा टस जितेर ब्याटिङ थालेको अफगानिस्तान ४०.१ ओभरमा १४५ रनमा अलआउट भयो ।
उसका लागि एएम घजनफारले २१ बलमा ३७ रन जोड्दा नशिर खान मरुफकहिलले ८३ बलमा ३१ रन जोडे । यस्तै, हशन इशाकहिलले ३५ बलमा २० रन जोड्दा फरिघदुन दाउदजाईले ६५ बलमा २९ रन बनाए । अन्य ब्याट्सम्यानले दोहोरो अंकमा रन बनाउन सकेनन् ।
नेपालका आकाश चन्दले ५ विकेट लिँदा दिपेश कँडेलले २ तथा गुलशन झा, तिलक भण्डारी र सुवाश भण्डारीले १–१ विकेट लिए ।
नेपाल र अफगानिस्तान यु–१९ विश्वकपमा पहिलो पटक आमने सामने भएका हुन् । प्रतियोगिताको सुपर सिक्समा प्रवेश गर्नका लागि पनि नेपालले आजको खेल जित्नैपर्ने दबाब छ ।
समूह ‘डी’को पहिलो खेलमा नेपाल न्यूजिल्यान्डसँग ६४ रनले र दोस्रो खेलमा पाकिस्तानसँग पाँच विकेटको पराजित भएको थियो । अफगानिस्तानले भने पहिलो खेलमा पाकिस्तानसँग एक ८१ रन र दोस्रो खेलमा न्यूजिल्यान्डसँग एक विकेटको हार बेहोरेको थियो ।
