काठमाडौं । हालको भिजिट भिसासम्बन्धी १७ बुँदे कार्यविधिका कारण सेटिङ र ठगी बढेको, विदेश जानेले दुःख पाएको र केहीले बदमासीसमेत गरेको पाइएपछि त्यसलाई रोक्न सरकारले उक्त कार्यविधि खारेज गरेको छ।
यसअघिको १७ बुँदे कार्यविधिको कडाइले नक्कली कागजात बनाउने गिरोहको चलखेललाई मलजल गरेको देखिएपछि पुरानो कार्यविधि खारेज गर्दै गृह मन्त्रालयले ६ बुँदे नयाँ कार्यविधि जारी गरेको हो।
उपप्रधान तथा गृहमन्त्री नारायणकाजी श्रेष्ठको मन्त्रीस्तरीय निर्णयबाट २०७८ साल फागुन २५ मा जारी भएको १७ बुँदे कार्यविधि खारेज गरी नयाँ कार्यविधि जारी गरिएको गृहमन्त्री श्रेष्ठका प्रेस सल्लाहकार कमल गिरीले जानकारी दिनुभयो।
उहाँले भन्नुभयो– ‘यसअघिको कार्यविधिले सेटिङधारीलाई सजिलो बनाएको र विदेश गएर सर्वसाधारण नेपालीले अत्यधिक दुःखकष्ट व्यहोर्न बाध्य भएकोले त्यस्तो अवस्था आउन नदिन पुरानो कार्यविधि खारेज गरी नयाँ कार्यविधि जारी गरिएको हो।’
नयाँ कार्यविधिमा भिजिट भिसामा यात्रा गर्दा कम्तीमा ६ महिनाको वैध अवधि भएको राहदानी हुनुपर्ने, सम्बन्धित देशको प्रवेशाज्ञा ९भिसा० वा अनअराइभल भिसा प्राप्त हुने मुलुक भए प्रवेषाज्ञा नचाहिने व्यवस्था गरिएको छ।
यसै गरी नयाँ कार्यविधिमा दुईतर्फी हवाई टिकट आवश्यक पर्ने, भ्रमण अवधिभर होटल बुकिङ नभई आफन्तसँग रहने भएमा एकाघरका तीन पुस्ताभित्रको नाता खुल्ने नागरिकता प्रमाणपत्र वा अन्य कुनै प्रमाणपत्र चाहिने, भ्रमणको सम्पूर्ण खर्च व्यहोर्ने सरकारी तथा तथा गैरसकारी संस्थाको निमन्त्रणापत्र वा सो नभएमा कम्तीमा ५ सय अमेरिकी डलर बराबरको नगद सटही भएको प्रमाणपत्र, संयुक्त अरब इमिरेट्स, बहराइन, कुबेत, कतार, ओमन, र साउदी अरेबियामा भिजिट भिसामा भ्रमण गर्दा स्वघोषणा गर्नुपर्ने प्रावधान कार्यविधिमा राखिएको छ।
यसै गरी स्वघोषणामा संलग्न विवरणको प्रमाणको भार सम्बन्धित व्यक्तिमा रहने र स्वघोषणाको ढाँचा विभागले निर्धारण गरेबमोजिम हुने कार्यविधिमा उल्लेख छ।
नयाँ कार्यविधिले भिजिट भिसामा जाने नेपालीका लागि सहज हुने अध्यागमन विभागका महानिर्देशक रुद्रसिंह तामाङले जानकारी दिनुभयो।
उहाँले भिजिट तथा पर्यटकीय भिसामा विदेश प्रस्थान गर्ने यात्रुहरूलाई प्रस्थान अनुमति दिने प्रक्रियालाई सरल बनाइएको बताउँदै घुम्ने र परिवार भेट्न जाने यात्रुहरूले सेटिङको नाममा कुनै पनि बिचौलियालाई रकम बुझाउन नहुने स्पष्ट पार्नुभएको छ।
अध्यागमन विभागका महानिर्देशक तामाङले भिजिट तथा पर्यटकीय भिसामा यात्रा गर्नुअघि अनिवार्य रूपमा विभागले जारी गरेको यात्रा परामर्श अध्ययन गर्नसमेत आग्रह गर्नुभएको छ।
साथै, अध्यागमन विभागले मंगलबार नै भिजिट तथा पर्यटकीय भिसामा विदेश जाँदा अपनाउनुपर्ने प्रक्रियाका बारेमा स्पष्ट पार्न १३ बुदे यात्रा परामर्श जारी गरेको छ।
नयाँ कार्यविधिले भिजिट भिसामा विदेश जाने र उतै हराउने प्रवृत्तिसमेत रोकिने विश्वास गरिएको छ। नेपाल समाचारपत्र
